فراكسیۆنی یەكێتی لە هەوڵی ئەوەدایە عێراق سەرجەم گەنمی جوتیارانی هەرێم وەربگرێت

عەلی حەمە سەعید-SNN

بە مەبەستی ڕەتكردنەوەی ئەو بڕیارەی كە لەبارەی وەرگرتنی بەشەگەنمی جوتیارانی هەرێمی كوردستان دراوە، بەهەوڵی پەرلەمانتارانی یەكێتی لە پەرلەمانی عێراق زیاتر لە 100 واژوو كۆكراونەتەوە بۆ ئەوەی حكومەتی عێراق پابەند بكرێ تەواوی گەنمی جووتیارانی هەرێمی كوردستان وەربگرێت.

سروە محەمەد، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: وەك ئەركی سەرشانمان و بەمەبەستی پشتگیریكردنی داواكاری جوتیارانی هەرێم و هەروەها پاڵپشتیكردنی بەرهەمی ناوخۆیی، دەستمان بە هەڵمەتێكی كۆكردنەوەی واژووكردووە بۆ ئەوەی حكومەتی عێراقی پابەند بكرێت هاوشێوەی جوتیارانی عێراق سەرجەم بڕە گەنمی جوتیارانی هەرێمی كوردستانیش وەربگرێت.

ئاماژەی بەوەشكرد، تا ئێستا بە واووژی 100 پەرلەمانتاری فراكسیۆنە جیاوازەكان كۆكراونەتەوە ئاراستەی دەستەی سەرۆكایەتی پەرلەمان كراون بۆئەوەی لە نزیكترین كاتدا سەرۆكایەتیی پەرلەمان بیخاتە بەرنامەی كار و بڕیارێك پەسند بكرێت، كە لەبەرژەوەندی جوتیارانی هەرێمی كوردستاندا بێت و حكومەتی عێراق پابەند بكات جیاوازی نەكات لەنێوان جوتیارانی عێراق و هەرێمی كوردستان.

ئەوەش لەكاتێكدایە كە هەفتەی ڕابردووتر حكومەتی عێراقی بڕیاریدا تەنها 400 هەزار تۆن گەنمی جوتیارانی هەرێم وەربگیرێت بەجۆرێك 292 هەزار تۆن بە 700 هەزار دینار و 108 هەزار تۆن لە دەرەوەی پلان بە 500 هەزار دینار، لەكاتیكدا هیچ سنوور و بڕێك بۆ وەرگرتنی گەنمی جوتیارانی عێراق دانەنراوە و سەرجەمیان لێوەردەگیرێت.