هەڵمەتی نەهێشتنی سەرپێچییەکانی سەر کارەبا دەستیپێکرد

SNN

هەڵمەتی نەهێشتنی سەر پێچییەکانی سەر تۆڕی نیشتمانی دەستی پێکردو بەڕێوەبەری کارەبایی هەولێریش رایدەگەیەنێت: چاوپۆشی لە هیچ کەسێک ناکەن.

ئەمڕۆ دووشەممە 8ی حوزەیران، بەڕێوەبەرایەتی کارەبای هەولێر بە‌هەماهەنگی قایقامییەتەکان هەڵمەتی بڕینی سەرپێچییەکانی کارەبای نیشتمانی دەستپێکرد و لە کۆنگرەیەکی رۆژنامەنوسیشدا نەبەز عەبدولحەمید، قایمقامی قەزای ناوەندی هەولێر رایگەیاند: “ئەم هەڵمەتە بە هاوکاری پۆلیس و ئاسایش بەڕێوەدەچێت بۆ بڕینی زێدەڕۆییەکانی سەر کارەبای نیشتمانی لەم قۆناغەش باغ و ڤێلا و شوێنە بازرگانی و پیشەسازییەکان دەگرێتەوە و ماڵانیش ئەوانەی کارەبایان لە قوتابخانەو بیرەکانی ئاو ڕاکێشاوە لێیان دەبڕێت”.

لەلایەن خۆشیەوە حوسێن حەمەد، بەڕێوەبەری دابەشکردنی کارەبای هەولێر ئاماژەی بەوەشکرد: “لە هەڵمەتی ڕابردوو بایی یەک ملیار دینار سزای دارایی بەسەر زێدەڕۆیی کارانی کارەبادا سەپێنراوە و ئەمڕۆش لەناو شاری هەولێر لەسنووری بەڕێوەبەرایەتی یەک و دووی کارەبای هەولێر و قەزاکانی کۆیە و شەقلاوە و سۆران هەڵمەتی بڕینی کارەبای سەرپێچی دەستپێدەکەینەوە”.

روونیشیکردەوە: “تیمەکانیان هەر سەرێچییەک بدۆزنەوە خاوەنەکەی دەدەنە دادگاو دۆسیەی یاسایی بەرامبەر دەکەنەوەو چاوپۆشیش لە هیچ کەس و لایەنێک ناکەن و ئەگەریش سەرپێچیکار خۆی ئاگادارمان بکاتەوە هیچ سزایەکی ماددی نادەین، بەڵکو مۆڵەتی کارەبای بۆ دروست دەکەین”.