کەشی فێنک و هەورە بروسکە و تاوە باران بەردەوامی ئەبێت

SNN

ئاراس جەبار شارەزای بواری کەشناسی رایگەیاند: سبەی پێنجشەمە 21/5/2026 لەئەنجامی تێپەرینی بارستە هەوایەکی سارد لەچینە بەرزەکانی بەرگە هەوادا لەکاتەکانی بەیانیەوە حاڵەتێکی ناجێگیری کەش لەناوچەکانی هەرێمی کوردستان دەستپێدەکاتەوە و سەرەتاش لەناوچەکانی سنووری ئیدارەی زاخۆ و پارێزگای دهۆکەوە و دەستپێدەکات و ئەگەری تاوە بارانی بەخوڕ و ڕوودانی هەورە بروسکەی بەهێز لە زۆربەی ناوچەکانی پارێزگاکە ئەبێت پاشان لەکاتەکانی نیوەرۆ بۆ ئێوارە کاریگەری ئەو ناجێگیریە درێژ ئەبێتەوە بۆ ناوچەکانی سنوری پارێزگای هەولێر و ئیدارەی سۆران و راپەرین و سنوری پارێزگای سلێمانی و هەڵەبجە لەهەندێ شوێندا تاوە بارانی مامناوەندی کورت خایان ئەبارێت لەگەڵ چالاکبوونی هەورە بروسکە و چالاکبوونی بای باشوری رۆژئاوا بەخێرای 20-40کم/ک ، پلەکانی گەرما بەجێگیری ئەمێنێتەوە و کەش و هەوای فێنک بەردەوامی ئەبێت .

بۆ دوو سبەی رۆژی هەینی 22/5/2026 کاریگەری بارستە هەوا فێنکەکە بەردەوامی ئەبێت و کەش و هەوا لەزۆربەی ناوچەکان جێگیر ئەبێت و ئەگەرێکی لاواز هەیە کە لەکاتەکانی دوای نیوەرۆ بۆ ئێوارە هەورە بروسکە و تاوە بارانی کورت خایان لەهەندێ شوێنی سنوری ئیدارەی سۆران و ناوچە شاخاویەکانی پارێزگای دهۆک چالاکببێتەوە و پاشان کۆتایی پێدێت.

لای خۆشییەوە، بەڕێوەبەرایەتیی کەشناسی و بوومەلەرزەزانیی هەرێمی کوردستان ئاماری بارانبارینی ناوچە جیاوازەکانی بڵاوکردەوە. بەپێی ئامارەکان، لە زاخۆ 12.8 ملیم باران باریوە کە بەرزترین ڕێژەیە، لە دەربەندیخان 12 ملیم و لە سلێمانی 10.1 ملیم باران تۆمار کراوە. هەروەها لە پیرمام 7.9 ملیم، لە حاجی ئۆمەران 6.2 ملیم، لە سۆران 6 ملیم و لە هەریەکە لە چەمچەماڵ و مەیدان 5 ملیم باران باریوە.