مەیدانی ئاژەڵان
SNN-
عەلی حەمە سەعید-SNN
لەگەڵ نزیك بوونەوە لە ڕۆژانی جەژنی قوربان تادێت نرخخی ئاژەڵ لە بازاڕەكانی ناوخۆ زیاتر بەرز دەبێتەوە، بەوتەی بەڕێوەبەری سامانی ئاژەڵ لە وەزارەتی كشتوكاڵ، هۆكاری بەرز بوونەوەی نرخ زیادكردنی گومرگ و زۆری خواستە لەسەر گۆشتی ئاژەڵ بە تایبەت بۆ قوربانیكردن.
ئاری محەمەد، كە كاری كڕین و فرۆشتنی ئاژەڵ دەكات بە SNNی ڕاگەیاند: نرخی كیلۆیەك ئاژەڵی گەورە وەك مانگا و گوێرەكە بە زیندوویی ئەمڕۆ بە حەوت هەزار و 750 دینارە، هەروەها ئاژەڵی بچووك بە نۆ هەزار دینارە، بەراورد بە چەند رۆژی رابردوو كیلۆیەك نزیكەی هەزار و 500 دینار گران بووە، هاوكات هەر كیلۆیەك گۆشت لە قەسابخخانەكان نزیكەی دوو هەزار و 500 دیناری چووەتە سەر.
فیراس سدیق، بەڕێوەبەری سامانی ئاژەڵ لە وەزارەتی كشتوكاڵ بە SNNی ڕاگەیاند: نرخی گۆشت لە تەواوی وڵاتانی ناوچەكە بەرزبووەتەوە، ئەوەش بەهۆی ئەوەی خواستی زۆر لەسەر كڕینی ئاژەڵ هەیە بەمەبەستی قوربانیكردن و هەروەها و دۆخی ئەمنی ناوچەكە بەتایبەت جەنگی ئێران و ئەمریكا هۆكارێكی دیكەی بەرز بوونەوەی نرخخی ئاژەڵە.
ئاماژەی بەوەشكرد،لە هەرێمی كوردستان زۆرترین ئاژەڵی هاوردەكراو لە ولاتی بەرازیلەوە دێت، بەڵام پێشتر تۆنێك ئاژەڵ بە زیندوویی لە بەڕازیل بە دوو هەزار و 200 دۆلار بوو، بەڵام ئێستا بڕی گومرگ بۆ هەر تۆنێك بەرز بووەتەوە بۆسێ عەزار و 300 دۆلار، لەگەڵ ئەوەشدا پێشتر لە خاڵەكانی هەرێمی كوردستان تۆنێك ئاژەڵ 130 دۆلار گومرگی هەبوو، بەڵام ئێستا لە رێگەی ئاویی لە بەسڕەوە هاوردە دەكرێت تۆنێك گومرگی كراوەتە 500 دۆلار.
