دۆناڵد ترەمپ
SNN-
سەرۆکی ئەمریکا وەڵامی ئەو دەنگۆیانە دەداتەوە کە باس لە تێکچوونی باری تەندروستی و هزریی دەکەن و ڕایدەگەیەنێت، پزیشکەکان بە “بلیمەت” وەسفیان کردووە و پشکنینەکان زیرەکیی ئەویان سەلماندووە.
ئەنجامی پشکنینە پزیشکییەکانی مێشک
دۆناڵد ترەمپ، سەرۆکی ئەمریکا لە وتارێکدا لە نیویۆرک ڕایگەیاند، پشکنینی هزری و مێشکی ئەنجامداوە و دەرکەوتووە کە ئەو “زیرەکترین کەسە”. ئاماژەی بەوەش کرد، پزیشکەکان پێیان گوتووە کە ئەو بلیمەتە و توانای ئەوەی هەیە دەست بەسەر تەواوی جیهاندا بگرێت. ترەمپ جەختی کردەوە کە پزیشکەکان سەرسام بوون بە ئاستی زیرەکییەکەی.
داهاتی نەوتی ڤەنزوێلا و تێچووی جەنگ
لە بەشێکی دیکەی قسەکانیدا، ترەمپ ئاماژەی بە دەستکەوتە ئابوورییەکانی ئەمریکا کرد و ڕایگەیاند، بڕی 25 هێندەی ئەو تێچووەی لە شەڕی ئێراندا خەرجیان کردووە، لە نەوتی ڤەنزوێلا دەستیان کەوتووەتەوە. ئەم لێدوانەی ترەمپ وەک ئاماژەیەک بوو بۆ سوودە داراییەکانی ئەو هەنگاوانەی کە وڵاتەکەی لە دەرەوەی سنوورەکان ئەنجامی داون.
گومانەکان لەسەر تەندروستیی ترەمپ
ئەم لێدوانانەی ترەمپ لە کاتێکدایە کە لێرەو لەوێ ڕۆژنامەنووسان و ڕاپۆرتە میدیاییەکان باس لە خراپیی دۆخی تەندروستی، جەستەیی و دەروونیی ترەمپ دەکەن کە تەمەنی گەیشتووەتە 79 ساڵ. ئەم دۆخە وایکردووە کە کۆشکی سپی لە ڕاگەیەندراوێکی فەرمیدا ئاشکرای بکات کە پشکنینی پزیشکیی پێویست بۆ سەرۆک ئەنجام دەدەن تاوەکو ڕاستییەکان بۆ ڕایگشتی ڕوون بێتەوە.
دەقی وتەکانی دۆناڵد ترەمپ
سەرۆکی ئەمریکا لە وتارەکەیدا وتی: “هەرگیز گوێتان لێنەبووە ئەمە بە خۆم بڵێم، من زیرەکترین کەسم تا ئێستا بینیبێتتان. ئایا ئێوە کەسێکی زیرەکتان ناوێت بۆ ئەوەی سەرۆک بێت؟ لە ڕاستیدا من پشکنینی هزریم کرد و پێیان وتم بلیمەتە. سەرەتا گوتیان دەیەوێت کۆنترۆڵی تەواوی وڵاتەکە بکات، دواتر گوتیان نانا تەواوی جیهانی دەوێت، هەربۆیە لە ئێرانە”.
سەبارەت بە کەرتی وزەش وتی: “ئەوەی لە ڤەنزوێلا کردمان چۆن بوو؟ خراپ نەبوو. بڕێکی زۆر نەوتمان لە ڤەنزوێلا دەرهێناوە کە 25 هێندەی ئەوەمان دەستکەوتووە کە لە شەڕەکەدا خەرجمان کردووە. من بە پزیشکەکەم گوت با پرسیارێکت لێبکەم، پێیان گوتم بلیمەت و زۆر زیرەکە”.
