قەیس خەزعەلی بڕیاری ڕادەستکردنی چەکەکانی دا؛ عەسائیب ئەهلی حەق چەکەکانی ڕادەستی دەوڵەت دەکات

SNN-

بزوتنەوەی عەسائیب ئەهلی حەق بە فەرمی بڕیاری جیابوونەوەی لە باڵە سەربازییەکانی ناو حەشدی شەعبی ڕاگەیاند و هەموو چەک و پێداویستییە لۆجستییەکانی دەخاتە ژێر فەرماندەیی گشتیی هێزە چەکدارەکانی عێراق.

پابەندبوون بە مەرجەعییەت و بڕیارە نیشتمانییەکان
بزوتنەوەی عەسائیب ئەهلی حەق ئاماژەی بەوە کرد کە ئەم هەنگاوە لە پێناو پابەندبوونە بە داواکاریی مەرجەعیەتی باڵای ئایینی و پاڵپشتیکردنی هەڵوێستی نیشتمانیی لایەنەکانی ناو “چوارچێوەی هەماهەنگی”. ئەم بڕیارە جەختکردنەوەیە لەسەر ئەو پڕۆژەیەی کە شێخ قەیس خەزعەلی، ئەمینداری گشتیی بزوتنەوەکە لە ساڵی 2017ـەوە پێشنیازی کردبوو، بۆ جیابوونەوەی باڵی سیاسی لە سەربازی و کۆنترۆڵکردنی چەک لەژێر دەسەڵاتی دەوڵەتدا.

پێکهێنانی لیژنەیەکی ناوەندی بۆ ڕادەستکردنی چەک
بۆ جێبەجێکردنی پڕۆسەی جیابوونەوەکە، سەرکردایەتیی بزوتنەوەکە بڕیاریدا بە پێکهێنانی لیژنەیەکی ناوەندی بە سەرۆکایەتیی حاج جەواد تڵێباوی. لیژنەکە لە ئەندامییەتی هەر یەک لە (ڕافد ساڵح عەلی، عەبدولڵا شاکر کامل و عەلی حەمزە کازم) پێکدێت، کە ئەرکیان جێبەجێکردنی سەرجەم ڕێکارە یاسایی و سەربازییەکانی ئەم گۆڕانکارییە دەبێت.

هەژمارکردنی ئەندامان و پێداویستییە لۆجستییەکان
لیژنە دیاریکراوەکە هەڵدەستێت بە ئەنجامدانی وردبینی و ژماردنی سەرجەم ئەندامان، چەکەکان، ئامێرەکان و پێداویستییە لۆجستییەکان بە گشتی. بەپێی بڕیارەکە، تەواوی ئەم هێزانە دەبەسترێنەوە بە فەرماندەی گشتیی هێزە چەکدارەکان، بە جۆرێک کە لەگەڵ پێداویستییەکانی دەوڵەت و دامەزراوە ئەمنییە فەرمییەکانی عێراقدا یەکبگیرێن و لەژێر چەتری یاسادا کار بکەن.