ئەمڕۆ ئەنجومەنی وەزیرانی هەرێمی کوردستان کۆدەبێتەوە

SNN

ئەنجومەنی وەزیرانی هەرێمی کوردستان ئەمڕۆ چوارشەممە 10ی حوزەیرانی 2026، کۆبوونەوەی ئاسایی خۆی ئەنجام دەدات و تێیدا سێ تەوەری سەرەکی و گرنگ کە پەیوەستن بە دۆسیەی نەوت، داهاتی ناوخۆ و پەیوەندییەکانی نێوان هەولێر و بەغدا تاوتوێ دەکات.

پێشنیاری دروستکردنی دەستەیەکی باڵای هاوبەش لەگەڵ بەغدا

لە تەوەری یەکەمی کۆبوونەوەی ئەمڕۆی ئەنجوومەنی وەزیراندا، گفتوگۆ لەسەر پێشنیاری هێنانەکایەی دەستەیەکی باڵای وەزاریی هەمیشەیی دەکرێت کە ئەندامەکانی پێکهاتوون لە وەزیر و بەرپرسانی پەیوەندیداری هەردوو حکومەتی فیدراڵی و هەرێمی کوردستان، ئەمەش بە ئامانجی دابینکردنی میکانیزمێکی بەردەوام بۆ بەدواداچوونی جێبەجێکردنی ڕێککەوتن و بڕیارە هاوبەشەکانی نێوانیان.

دۆسیەی نەوت و پرسی داهاتە ناوخۆییەکان

تەوەری دووەمی کۆبوونەوەکە تایبەت دەبێت بە خستنەڕووی دواین پێشهاتەکانی دۆسیەی نەوت لەگەڵ حکومەتی فیدراڵی و دەرئەنجامی کۆبوونەوەی ڕۆژی 3ی حوزەیرانی شاندی هەرێم و کۆمپانیا نەوتییەکان لەگەڵ سەرۆک وەزیرانی عێراق.

لە تەوەری سێیەمیشدا، دۆسیەی داهاتە ناوخۆییەکان و سیستمی ئەسیکودا، خشتەی داهاتەکان، و کاریگەرییەکانی یەکلایی نەکردنەوەی ئەم دۆسیەیە لەسەر کەمبوونەوەی بەردەوامی داهاتی گشتی و مووچە تاوتوێ دەکرێن.