مەرجەکانی کۆمپانیا بیانییەکان بۆ دەستپێکردنەوەی بەرهەمهێنانی نەوتی کوردستان ئاشكرا دەبن

SNN –

کۆمپانیا بیانییەکانی بواری نەوت و گاز لە هەرێمی کوردستان، چەند مەرجێکی سەرەکی و بنەڕەتییان بۆ دەستپێکردنەوەی پڕۆسەی بەرهەمهێنان و هەناردەکردنی نەوت دیاریکردووە، کە تێیدا ڕەهەندەکانی ئەمنی و دارایی لە پێشەنگی داواکارییەکانیاندایە.

نەبیل مەرسومی، شارەزای ئابوری عێراق مەرجەکانی بڵاوکردووەتەوە کە ئەمانەن:

یەکەم: پاراستنی کێڵگەکان لە هێرشی درۆن و مووشەک

کۆمپانیا بیانییەکان وەک مەرجی یەکەم و لەپێناو مسۆگەرکردنی سەلامەتی دامەزراوەکان، ستافە هونەرییەکان و ئەندازیارە بیانییەکانیان، داوا دەکەن کێڵگە و بیرە نەوتییەکان لە هێرشی فڕۆکەی بێفڕۆکەوان (درۆن) و مووشەکی بپارێزرێن و زەمینەیەکی ئارام بۆ کارەکانیان دابین بکرێت.

دووەم: دانانی میکانیزمێکی ڕوون بۆ شایستە داراییەکان

داوا دەکەن میکانیزمێکی شەفاف و ڕوون دابنرێت کە گەرەنتی پێدانی ڕێکوپێک و بەردەوامی شایستە داراییە نوێیەکانیان بکات هاوشانی دەستپێکردنەوەی هەناردەکردنی نەوت، بە شێوازێک کە تەواو بگونجێت لەگەڵ هەموارکردنی یاسای بودجەی فیدراڵیی عێراقدا.

سێیەم: پابەندبوون بە دانەوەی قەرز و شایستە کۆنەکان

کۆمپانیاکان جەخت لەسەر پێویستی پابەندبوون بە دانەوەی سەرجەم قەرز و شایستە داراییە کەڵەکەبووەکانی ڕابردوویان دەکەنەوە، کە بەهۆی ڕاگرتنی هەناردەکردنەوە دواکەوتووە.

چوارەم: پرسی کۆمپانیای DNOی نەرویجی

کێشەی کۆمپانیای نەوتی نەرویجی DNO لە پێشەنگی بەربەستەکاندایە؛ ئەم کۆمپانیایە پێشتر بە فەرمی ڕایگەیاندبوو کە بەرهەمهێنان و هەناردەکردنی نەوت لە ڕێگەی بۆرییەکانی هەرێمی کوردستانەوە ڕادەگرێت، تا ئەو کاتەی کێشەی شایستە دواکەوتووەکانی چارەسەر دەکرێت، کە بڕەکەی بە نزیکەی 1 ملیار دۆلار دەخەمڵێندرێت.