سێنتکۆم: چەند فڕۆکەیەکی بێفۆکەوانی ئێرانمان لە گەرووی هورمز خستە خوارەوە

SNN – تایبەت

فەرماندەیی ناوەندیی هێزەکانی ئەمریکا (CENTCOM) ڕایگەیاند، کە هێزەکانیان لە کاتژمێرەکانی ڕابردوودا سەرجەم ئەو فڕۆکە بێفۆکەوانە هێرشبەرانەیان خستووەتە خوارەوە کە لەلایەن ئێرانەوە ئاڕاستەی گەرووی هورمز کرابوون.

سێنتکۆم لە ڕاگەیەندراوێکدا لە هەژماری فەرمی خۆی لە ئێکس بڵاویکردووەتەوە و دەڵێت:”ئێران چەندین فڕۆکەی بێفۆکەوانی هێرشبەری یەک ئاراستەیی (خۆکوژ)ی بە مەبەستی لێدانی ئەو کەشتییە بازرگانییانە تەقاندووە کە بە گەرووی هورمزدا تێپەڕدەبن.”

راشیگەیاند: “هێزەکانی ئەمریکا توانیویانە سەرجەم فڕۆکە بێفۆکەوانەکان بخەنە خوارەوە و لە ئێستاشدا هاتوچۆی کەشتییەکان لە گەرووەکەدا بە شێوەیەکی ئاسایی و بێ هیچ ڕێگرییەک بەردەوامە.”

فەرماندەیی ناوەندیی ئەمریکا جەختیشی کردەوە کە ڕێڕەوی بازرگانی نێودەوڵەتی لە ناوچەکەدا بە کراوەیی ماوەتەوە و هاتوچۆی تێدا پەکنەکەوتووە.