مووچە و وەزارەتی دارایی
SNN-
پرۆسەی ئامادەکردنی لیستی مووچەی مانگی حوزەیرانی فەرمانبەرانی هەرێمی کوردستان بە سیستەمی “پەیڕۆڵ” تەواو کرا؛ لە کاتێکدا ئامادەکاری بۆ ناردنی لیستەکە بۆ بەغدا دەکرێت، بەرپرسانی دارایی هۆشداری لە کەمبوونەوەی داهاتی نانەوتیی و دروستبوونی کورتهێنان دەدەن.
ئامادەکردنی لیستی مووچەی حوزەیران بە سیستەمی پەیڕۆڵ
یادگار جەبار، سەرپەرشتیاری بایۆمەتری سلێمانی ڕایگەیاند، لیستی مووچەی مانگی 6ـی مووچەخۆرانی سلێمانی، هەڵەبجە، ئیدارەکانی ڕاپەڕین و گەرمیان بە سیستەمی پەیڕۆڵ تەواو کراوە. لیستەکە لەلایەن گەنجینەکانی سلێمانییەوە پەسەند کراوە و ڕەوانەی وەزارەتی دارایی و ئابووریی هەرێمی کوردستان کراوە بۆ ئەوەی ڕێکارە کۆتاییەکانی بۆ جێبەجێ بکرێت.
کاتی ڕەوانەکردنی لیستەکان بۆ بەغدا
بەپێی بەدواداچوونەکان، بڕیارە لە کۆتایی ئەم هەفتەیەدا و دوای وردبینیی وەزارەتی دارایی، لیستی مووچەی حوزەیران لەگەڵ تەرازووی پێداچوونەوەی مانگی ئایار ڕەوانەی بەغدا بکرێت. لە ڕۆژی یەکشەممەی داهاتووەوە وردبینی بۆ ئەو لیستانە دەکرێت کە گەیشتوونەتە وەزارەت و پێویستە تاوەکو ڕۆژی دووشەممە سەرجەم لیستەکان تەواو بکرێن.
کێشەی داهاتی نانەوتیی و کورتهێنانی دارایی
بەرپرسێکی وەزارەتی دارایی ئاشکرای کرد، بەهۆی ئەوەی داهاتی نانەوتیی هەرێمی کوردستان بە ڕێژەی زیاتر لە 60% کەمبووەتەوە، حکومەت لە توانایدا نییە مانگانە بڕی 120 ملیار دینار وەک داهاتی نانەوتیی ڕەوانەی بەغداد بکات. جەخت لەوەش کراوەتەوە کە ئەگەر بەغداد مانگانە ئەو 120 ملیار دینارە لە تەمویلی مووچە ببڕێت، حکومەتی هەرێم لە مانگی حوزەیران و مانگەکانی داهاتوودا ڕووبەڕووی کورتهێنانی دارایی دەبێتەوە.
ڕێکخستنەوەی داهات و گفتوگۆ لەگەڵ حکومەتی فیدراڵ
حکومەتی هەرێمی کوردستان لە کۆبوونەوەی ئەنجوومەنی وەزیراندا بڕیاری داوە کۆکردنەوەی داهات ڕێکبخاتەوە و بەشێک لە خەرجییەکان کەم بکاتەوە. بڕیاریشە شاندێکی دارایی سەردانی بەغداد بکات بۆ گفتوگۆکردن لەسەر کێشەی داهاتی نانەوتیی مانگی حوزەیران و دۆزینەوەی چارەسەرێک بۆ کەمکردنەوەی ئەو بڕە پارەیەی کە بەغداد مانگانە لە مووچەی دەبڕێت.
دۆخی بانکەکان و کاریگەریی کەمبوونەوەی داهات
بەرپرسێکی بانکی ناوەندیی هەرێم/ لقی سلێمانی ئاماژەی بەوە کرد، دۆخی دارایی هەرێمی کوردستان ناجێگیرە و کەمبوونەوەی داهاتی نانەوتیی کاریگەریی کردووەتە سەر دابینکردنی پێداویستییە ڕۆژانەییەکانی دامەزراوەکانی حکومەت. ئاماژەی بەوەش کرد، کاری لەپێشینەی بانکەکان لە ئێستادا دابینکردنی ئەو مووچانەیە کە تاوەکو ئێستا نەدراون، بۆ ئەو مەبەستەش هەر بڕە داهاتێک کۆببێتەوە بۆ مووچە تەرخان دەکرێت.
