پەرلەمانی عێراق کۆدەبێتەوە

SNN –

فەرمانگەی کاروباری پەرلەمانی لە ئەنجومەنی نوێنەرانی عێراق کارنامەی یەکەم دانیشتنی لە وەرزی دووەمی یاساداناندا بڵاوکردەوە، کە بڕیارە ئەمڕۆ دووشەممە 6ی تەمووزی 2026، کاتژمێر 1:00ی پاشنیوەڕۆ بەڕێوەبچێت.

کارنامەی دانیشتنەکە 4 بڕگە لەخۆدەگرێت کە خوێندنەوەی یەکەم بۆ ئەم پڕۆژەیاسایانە دەکرێت:

پڕۆژەیاسای تاوانە ئەلیکترۆنییەکان.

پڕۆژەیاسای هەموارکردنی یاسای چاودێریی نەوجەوانان.

پڕۆژەیاسای هەموارکردنی یاسای پارێزەرایەتی.

پڕۆژەیاسای پارەدارکردنی بەهێزکردنی سیستمی بەرگریی ئاسمانیی عێراق.

جێگەی ئاماژەیە، کارنامەی دانیشتنەکە هیچ بڕگەیەکی بۆ دەنگدان لەسەر تەواوکردنی کابینەی وزاریی نوێ لەخۆنەگرتووە. ئەمەش لە کاتێکدایە کە هێشتا 9 وەزارەت بە وەکالەت بەڕێوەدەبرێن، دوای ئەوەی وەزیرە پێشنیارکراوەکان لە دانیشتنی 14ی ئایاری 2026دا نەیانتوانی متمانەی ئەنجومەنی نوێنەران بەدەستبهێنن.