سەرۆكی كێڵگە پەلەوەرییەكان: ئەم کابینەیەی حکومەت هەرێم خراپترین کابینەبوو لە پشتگوێ خستنی کەرتی پەلەوەر

عەلی حەمە سەعید-SNN

سەرۆكی كۆمەڵەی كێڵگە پەلەوەرییەكان ئاماژە بەوەدەكات، ئەم کابنەیەی حكومەتی هەرێم بەسەرۆکایەتی مەسرور بارزانی هیچ كارئاسانییەكی بۆ نەكردوون و نایەوێت كەرتی پەلەوەر و بەرهەمی ناوخۆیی پێشكەوێت.

نازم عەبدوڵا، سەرۆكی كۆمەڵەی كێڵگە پەلەوەرییەكان لە سلێمانی بە SNNی ڕاگەیاند: لەگەڵ دەستبەكاربوونی كابینەی نۆیەمی حكومەتی هەرێم كەرتی پەلەوەر بەدەوام ڕووی لە كێشە و گرفت كردووە، بەجۆرێك حكومەتی هەرێمی كوردستان هیچ كارئاسانییەكی بۆ كەرتی پەلەوەر نەكردووە و تەنانەت زۆر جاریش گرفتی بۆ دروستكردوین.

ئاماژەی بەوەشكرد،ئێمە هەست ناكەین حكومەت بیەوێت ئەم كەرتە بەرەو پێشەوە بچێت، چونکەنایەوێت بەرهەمی ناوخۆیی پێشبكەوێت لەكاتێكدا ئێمەین ئاسایشی خۆراكی ئەم وڵاتەمان ڕاگرتووە و لەسەر گیرفانی خۆمان زۆرێك لە پێداویستییەكانمان دابینكردووە.

سەرۆكی كۆمەڵەی كێڵگە پەلەوەرییەكان ئەوەشی خستەڕوو، ئەم کابینەیەی حکومەتی هەرێم خراپترین کابینەبوو کە کەرتی پەلەوەری بەتەواوی فەرامۆشکردووە، چونکە لە گەڵ دەستبەکاربوونی ئەم کابینەیە خاوەن كیڵگەپەلەوەرییەكان زۆربەی کات لە زیاندان بوون، هاوکات بەهۆی بەرز بوونەوەی نرخی عەلەف و پێداتویستییەكانی دیكەی كێڵگە پەلەوەرییەكان، حکومەت هیچ کارئاسانییەکی بۆخاوەن کێڵگەکان نەکردووە.