كابینەكەی مەسروبارزانی حەوت ساڵی تێپەڕاند و بە خراپترین كابینەی حوكمڕانی وەسف دەكرێت

عەلی حەمە سەعید-SNN

ئەمڕۆ حەوت ساڵی تەواو تێپەڕدەبێت بەسەر دەستبەكار بوونی مەسوربارزانی وەك سەرۆكی حكومەتی كابینەی نۆ، بە وتەی هاووڵاتییان و چالاكوانی هەرێمی كوردستانیش ئەمە كابینەیە لە مێژووی حوكمڕانی كوردیدا خراپترین كابینە بووە و جیاوازیكردنی لە نێوان شاروشارۆچكەكان هێناوەتە كایەوە.

سەرباز محەمەد، چالاكوانی مەدەنی بە SNNی ڕاگەیاند: ئەمڕۆ تەمەنی كابینەی نۆی حكومەتی هەرێم حەوت ساڵ تێدەپەڕێنێت، كە دەبوو سێ‌ ساڵ پێش ئێستا ئەم كابینەیە كۆتایی پێبهاتایە و ڕێگەی بە كەسانی دیكە بدایە جومگە گرنگەكانی حوكمڕانی لە وەزارەت و دامەزراوە گشتیەكان ببردایە بەڕێوە، بەڵام سەرۆكی ئەم كابینەیە وای بۆ دەخوازێت كە ئەم دۆخە بەردەوامی هەبێت و بە بێ‌ ئەوەی بیر لەوە بكاتەوە بەرژەوەندی هاووڵاتیان لە چ قۆناغێكی خراپدایە.

ئاماژەی بەوەشكرد، لەمێژووی حوكمڕانی كوردیدا هیچ كابینەیەك هێندەی ئەم كابینەیە خراپ نەبووە چ لەڕووی دابەشنەكردنی مووچە و پاشە كەوتكردنی مووچە و زیادكردنی باج لەسەر هاووڵاتییان و دروستكردنی بارگرانی زیاتر لەسەر كەمدەرامەتان و هەروەها پەكخستنی پرۆژەكان و پشتگوێخستنی زۆرینەی شار و شارۆچكەكان بەتایبەت سلێمانی و هەڵەبجە.

رێبین محەمەد، یەكێك لە ڕۆشنبیرانی هەڵەبجە بە SNNی ڕاگەیاند: تاكە داهێنانی ئەم كابینەیەی حكومەتی هەرێم بە سەرۆكایەتی مەسروبارزانی برتییە لەوەی كە جیاوازی هێنایە كایەوە لە ئەنجامدانی پرۆژەكان لە نێوان شاروشارۆچكەكان، بە تایبەت دەڤەری هەولێر و دهۆك زۆر گرنگی پێدرا و سنوری سلێمانی و هەڵەبجە زۆر پەراوێزخست وەك ئەوەی بەشێك نەبن لەم هەرێمە