وەزارەتی پەروەردە ڕێکارەکانی پێدانی مۆڵەتی بێمووچە بۆ مامۆستایان دیاریدەکات

SNN-

وەزارەتی پەروەردەی حکومەتی هەرێمی کوردستان، بە نووسراوێک کە ئاڕاستەی گشت بەڕێوەبەرایەتییە گشتییەکانی پەروەردەی کردووە، ڕێکارەکانی پێدانی مۆڵەتی بێمووچەی بۆ ساڵی خوێندنی (2026-2027) دیاری کرد.

بەپێی نووسراوەکە، مەرج و ڕێکارەکان بەم شێوەیەی خوارەوەن:

وادەی پێشکەشکردن

مامۆستایان دەتوانن تا ڕێکەوتی 2026/8/25 فۆرمی مۆڵەتی بێمووچە (فۆرمی ژمارە 1) پڕبکەنەوە و پێشکەشی بەڕێوەبەرایەتییەکانی پەروەردەی قەزاکان بکەن.

مەرجی وەرگرتنی مۆڵەت

مۆڵەتی بێمووچە تەنها ئەو مامۆستایانە دەگرێتەوە کە لە دەرەوەی وڵاتن، یان لە کاتی مۆڵەتی بێمووچەدا سەفەریان کردووە، بە مەرجێک مافی مۆڵەتەکەیان مابێت و لە ڕێگەی نوێنەرایەتییەکانی حکومەتی هەرێم لە دەرەوەی وڵات داواکاری پێشکەش بکەن.

پابەندبوون بە کات

پێویستە مامۆستایان دوای تەواوبوونی ماوەی مۆڵەتەکەیان، لە ماوەی (10) ڕۆژدا دەست بە کارکردن بکەنەوە.

مۆڵەتی دایکایەتی

ئەو مامۆستا ئافرەتانەی مۆڵەتی دایکایەتییان وەرگرتووە، دەتوانن دوای تەواوبوونی ماوەکەی دەست بە کار بکەنەوە و مافی مۆڵەتی بێمووچەیان هەر دەمێنێت.

هەڵوەشاندنەوەی مۆڵەت

بۆ هەڵوەشاندنەوەی مۆڵەتی بێمووچە و گەڕانەوە بۆ دەوام، پێویستە مامۆستا فۆرمی ژمارە (2) پڕبکاتەوە و لە ماوەی (10) ڕۆژدا لە دوای دەرچوونی فەرمانی گەڕانەوە، دەست بە کار بکاتەوە.