سێنتکۆم بۆ یەکەمجار سیستەمی بەرگریی ئاسمانیی ئێران دەکاتە ئامانج
– SNN
فەرماندەیی ناوەندی ئەمریکا (CENTCOM)، کۆتایی هاتنی شەپۆلێکی چڕ و نوێی هێرشەکانی دژی پێگە سەربازییەکانی ئێران راگەیاند و جەختی کردەوە کە لە ئۆپەراسیۆنەکاندا دەیان پێگەی جیاواز لە چەند ناوچەیەک بە تەقەمەنیی ورد کراونەتە ئامانج.
وردەکاریی ئۆپەراسیۆنەکە
سێنتکۆم بە فەرمی رایگەیاند، بۆ یەکەمجارە سیستەمی بەرگریی ئاسمانیی سوپای ئێران دەکەنە ئامانج، ئەمەش وەک گۆڕانکارییەکی ستراتیژی لە جۆری هێرشەکاندا.
ئۆپەراسیۆنەکان رادارەکانی کەناراوەکان، توانای مووشەکی، سەکۆکانی هەڵدانی فڕۆکەی بێفڕۆکەوان (درۆن) و بەلەمە خێراکانی ئێرانی کردووەتە ئامانج.
فەرماندەیی ناوەندی ئەمریکا ئاماژەی بەوە کردووە، ئۆپەراسیۆنەکە بە ئامانجی لەناوبردنی ئەو توانایانەی تارانە کە بەردەوام بەکاریان دەهێنێت بۆ هەڕەشەکردن لە کەشتیوانیی نێودەوڵەتی لە گەرووی هورمز.
سێنتکۆم جەختی کردەوە کە گەرووی هورمز رێڕەوێکی دەریایی نێودەوڵەتیی گرنگە بۆ بازرگانیی جیهانی و “بە هیچ شێوەیەک قبوڵکراو نییە لەلایەن ئێرانەوە کۆنترۆڵ بکرێت”.
ئەم هێرشانە لە کاتێکدایە کە گرژییەکانی نێوان واشنتن و تاران لە ناوچەکە گەیشتووەتە لووتکە، ئەمەش دوای ئەوە دێت کە لە چەند کاتژمێری رابردوودا دەنگۆی تەقینەوە و پێکدادانی سەربازی لە بەحرەین و ناوچە جیاوازەکانی دیکەی کەنداو بڵاو بووەوە.
