375 کیلۆگرام زێڕی بریکاری پێشووی وەزارەتی نەوت دەستی بەسەردا گیرا و رادەستی بانکی ناوەندی کرا
SNN
ئەنجومەنی باڵای دادوەریی عێراق وردەکاریی دەستبەسەرداگرتنی بڕی 375 کیلۆگرام زێڕی پەیوەندیدار بە “عەدنان جومەیلی”، بریکاری پێشووی وەزارەتی نەوت ئاشکرا کرد، کە لە ئۆپەراسیۆنێکی هاوبەشی نێوان بەغدا و هەولێردا دەستی بەسەردا گیراوە.
وردەکاریی ئۆپەراسیۆنەکە
دادگای ناوەندیی تاوانەکانی بەرەنگاربوونەوەی گەندەڵی رایگەیاند، دەستبەسەرداگرتنی ئەو بڕە زێڕە بە هەماهەنگیی هاوبەشی نێوان حکومەتی فیدراڵی و دەسەڵاتدارانی هەرێمی کوردستان و بە سەرپەرشتیی راستەوخۆی “فایق زەیدان”، سەرۆکی ئەنجومەنی باڵای دادوەری ئەنجامدراوە.
بەپێی بەیاننامەکەی ئەنجومەنی باڵای دادوەری، 358 کیلۆگرام لەو زێڕە لە هەرێمی کوردستانەوە رادەست کراوەتەوە، لەگەڵ 17 کیلۆگرامی دیکە لە دۆسیەیەکی دیکەی لێکۆڵینەوەدا، کۆی گشتیی زێڕی دەستبەسەرداگیراو گەیشتووەتە 375 کیلۆگرام.
رادەستکردنەوە
سەرجەم ئەو بڕە زێڕە بە فەرمی رادەستی گەنجینەی بانکی ناوەندیی عێراق کراوە.
پێشتریش سەرچاوەیەکی ئەمنی لە پارێزگای کەرکوک ئاماژەی بەوە کردبوو کە فەرمانگەی لێکۆڵینەوەی کەرکوک بە پاڵپشتیی هێزێکی ئەمنی و بە سەرپەرشتیی راستەوخۆی دەستەی دەستپاکی فیدراڵی، دەستیان بەسەر بڕێک زێڕ و پارەی پەیوەندیدار بە ژمارەیەک پەرلەمانتار و کەسایەتی سیاسیی دیکەدا گرتووە، کە لەلایەن حکومەتی هەرێمی کوردستانەوە رادەستی حکومەتی فیدراڵی کراونەتەوە.
