دەستبەسەرداگرتنی بڕێکی زۆر پارە و زێڕ لە دۆسیەی عەدنان جومەیلی-دا

SNN

دەسەڵاتی دادوەری عێراق ڕایگەیاند، لە چوارچێوەی لێکۆڵینەوە بەردەوامەکان لە دۆسیەی عەدنان جومەیلی، بریکاری پێشووی وەزیری نەوت بۆ کاروباری پاڵاوتن، دەستیان بەسەر بڕێکی زۆر پارە و زێڕدا گرتووە.

نووسینگەی ڕاگەیاندنی دەسەڵاتی دادوەری لە بەیاننامەیەکدا ئاشکرایکرد، دادگای ناوەندیی تاوانەکانی دژە گەندەڵی توانیویەتی دەست بەسەر بڕی 25 ملیار دیناری عێراقی و 200 هەزار دۆلاری ئەمریکی و 4 کیلۆگرام زێڕدا بگرێت.

بەپێی بەیاننامەکە، بەشێک لەو پارانە لەلای چەند کەسێک بوون و بەشەکەی دیکەیان لەناو دیواری چەند خانوویەکدا شاردراونەتەوە. هاوکات دەسەڵاتی دادوەری جەختی کردەوە کە لێکۆڵینەوەکان لەگەڵ تۆمەتبار عەدنان جومەیلی هێشتا بەردەوامە، ئەمەش وەک بەشێک لە ڕێکارەکانی بەدواداچوون بۆ داهاتە بەدەستهاتووەکان لەو تاوانە و دەستگیرکردنی هەر کەسێکی دیکە کە پەیوەندییان پێوە هەبێت.