ئاوی سلێمانی:هێڵی دووی ئاوی دوکان – سلێمانی شکا و دابەشکردنی ئاو راگیرا

SNN-

بەڕێوەبەرایەتی ئاوی سلێمانی ڕایگەیاند، سەرلەبەیانیی ئەمڕۆ تیمەکانیان بە مەبەستی کارکردن بەو سێ پەمپەی کە لە پڕۆژەی ئاوی دوکان – سلێمانی تەواو بوون، ڕوویان لە هێڵی دوو کردووە بۆ ئەوەی دۆخی ئاو باشتر ببێتەوە و کێشەی کەمئاوی لەو گەڕەکەنەی کە بێبەش بوون چارەسەر بکرێت.

بەڵام لە کاتی جێبەجێکردنی کارەکاندا، تیمەکان ئاگادار کراونەتەوە کە بۆریی ئاوی دوکان – سلێمانی (هێڵی دوو) لە ناوچەی قولەرەیسی، بەهۆی کارکردنی شۆفڵێکەوە شکاوه.

بەڕێوەبەرایەتییەکە دڵنیایی داوە کە لە ئێستادا سەرجەم تیمەکانیان لە شوێنی ڕووداوەکەن و بە هەموو توانایەکەوە کار دەکەن بۆ ئەوەی بە زووترین کات بۆرییە شکاوەکە چاک بکرێتەوە و پرۆسەی دابەشکردنی ئاو بۆ گەڕەکەکان دەستپێبکاتەوە.