پەرلەمانتارێکی پارتی: مووچەی ئەمساڵ مسۆگەرە

SNN-

سیپان شێروانی، پەرلەمانتاری پارتی لە بەغدا، ڕایگەیاند کە مووچەی ئەمساڵی عێراق و هەرێمی کوردستان مسۆگەرە و هیچ مەترسییەکی لەسەر نییە.

ئەو پەرلەمانتارە لە تۆڕی کۆمەڵایەتی فەیسبووک بڵاویکردووەتەوە کە حکومەتی عێراق چەند ڕێگەیەکی لەبەردەمدایە بۆ ئەوەی بە شێوازێکی کاتی قەیرانی دارایی تێپەڕێنێت و مووچەی مووچەخۆران دابین بکات؛ لەوانەش دەرکردنی 20 بۆ30 تریلیۆن دینار لە ڕێگەی بانکی ناوەندییەوە.

شێروانی جەختی لەوەش کردووەتەوە کە کەمکردنەوەی خەرجییەکان، زیادکردنی داهاتی نانەوتی، زیادکردنی هەناردەی نەوت و بەهێزکردنی مامەڵەی دیجیتاڵی، دەتوانن یارمەتیدەر بن بۆ تێپەڕاندنی ئەم قەیرانە داراییە.

لە کۆتاییشدا، ئەم پەرلەمانتارە هۆشداریی داوە و ڕایگەیاندووە کە ئەگەر لە داهاتوودا هەنگاوی پێویست و کاریگەر نەگیرێنەبەر، مەترسیی داڕمان ئابووریی عێراق دەگرێتەوە.