هەرێمی کوردستان داوا دەکات لە پشکی بودجەی عێراق بکرێتە %14,2
پرۆژەیاسای بودجە
SNN
بەپێی زانیارییەكان، وەزارەتی دارایی عیراق سەرقاڵی ئامادەكردنی پڕۆژەیاسای بودجەی 2027ە، بۆیە لەم كاتەدا یەكگرتوویی كورد لە ئەنجوومەنی وەزیران و ئەنجوومەنی نوێنەران گرنتییە بۆ دەستەبەركردنی مافە دەستوورییەكانی هەرێمی كوردستان و هەرێم داوا دەكات پشكی لە بودجەی گشتیی عیراقدا بۆ سەدا 14 پۆینت دوو لەسەر بنەمای دوایین سەرژمێری بەرزبكرێتەوە.
هەرێمی كوردستان داوای ناردنی پشكی ساڵانە لە بودجەدا دەكات تا لەپاڵ خەرجی بەكاربردن، خەرجی وەبەرهێنانیش مسۆگەر ببات، دەستپێكردنەوەی پلەبەرزكردنەوەی فەرمانبەران و هاوتاكردنی مووچەی خانەنشینان و كەسوكاری شەهیدان و زیندانییانی سیاسی لەناو داواكارییەكاندا جێگیر كراون، بەهەمیشەییكردنی فەرمانبەرانی گرێبەست و دامەزراندنی سێ یەكەمەكان بەشێكی ترن لەو داوایانەی كار بۆ جێگیركردنیان لە بودجەدا دەكرێت.
وەزارەتی دارایی عیراق لەڕێگەی پێنج لیژنەو بەهەماهەنگی لەگەڵ بانكی نێودەوڵەتی سەرقاڵی ئامادەكردنی بودجەیەكی جیاوازە كە ناوی لێنراوە بودجەی پڕۆگرام، لە كاتێكدا عیراق ئەمساڵی بەبێ بودجە تێپەڕاندو لەسێ ساڵی ڕابردوودا تەنیا یەك بودجەی هەبووە. چاوەڕوان دەكرێت لەمانگی تشرینی یەكەمی داهاتوودا پڕۆژەیاساكە بگاتە ئەنجوومەنی نوێنەران.
