مەسعود پزیشکیان: ئێمە لەسەر خەزێنە خەوتوین نابێت هاووڵاتیەکانمان برسیبن

SNN-

سەرۆککۆماری ئێران رایگەیاند، درێژەکێشانی گەمارۆکان دەبێتە هۆی بەرزبوونەوەی زیاتری گرانبوونی کاڵاکان، بەوپێیەی تێچووی گواستنەوە و هاوردەکردن زیادیکردووە.

مەسعود پزیشکیانی سەرۆککۆماری ئێران لە چاوپێکەوتنێکی لەگەڵ میدیای وڵاتەکەی رایگەیاند، ئەوان لەسەر خەزێنە خەوتون و نابێت هاووڵاتیەکانیان برسیبن.

پزیشکیان ئاماژەی بەوەکردوە، بەهۆی گەمارۆکانەوە هاوردە و هەناردە بە رێژەی ٪25 بۆ ٪35 کەمی کردوە و ئەمەش کاریگەری تەواوی کردوەتە سەر ئابوری وڵاتەکەیان.

باسی لەوەشکرد، وڵاتەکەی لەسەر گەنجینەیەکی گەورەیە و نابێت هاووڵاتییەکانیان برسیبن، ئەگەر نەتوانن کێشەکانی خەڵک چارەسەر بکەن و سەرقاڵی ململانێی سیاسی بن، ناکرێت وەڵامی خوا بدەنەوە.

سەبارەت بە چارەسەرکردنی قەیرانی ئابووری و دابینکردنی پێداویستییەکان، سەرۆککۆمار رایگەیاند، لەڕێگەی بەشداریپێکردنی خەڵکەوە دەکرێت تا رادەیەکی زۆر کێشەی توێژە کەمدەرامەتەکان و کێشەی نیشتەجێبوون چارەسەر بکرێت.

داواشی کرد لەبری تۆمەتبارکردنی یەکتر، کەموکوڕییەکانی یەکتر پڕبکەنەوە، چونکە ناتوانێت بە تەنیا وڵات راستبکاتەوە و دەبێت هەمووان پێکەوە هەوڵی تێپەراندنی قەیرانەکە بدەن.