پەرلەمانی عێراق هەوڵدەدات مووچەی ئەم کەسانە زیاد بکات

SNN-

بەهۆی گیرۆدەبوونی پڕۆژەیاسای نوێی خشتەی مووچە لەنێوان 34 مادەی یاسایی جیاوازدا و پەککەوتنی لە پەرلەمان، حکومەت و پەرلەمانی عێراق هەوڵێکی چڕ دەدەن بۆ زیادکردنی موچەی فەرمانبەرانی پلە نزم وەک چارەسەرێکی خێرا و کاتی بۆ کەمکردنەوەی جیاوازییەکان و بەدیهێنانی دادپەروەری.

محەمەد حسێن ئەبو ئەلعیس، ئەندامی پەرلەمانی عێراق، ئاشکرای کردوە کە یاساکە پێویستی بە هەموارکردنەوەیەکی ورد هەیە. بۆ تێپەڕاندنی ئەم چەقبەستووییە، وەزیری دارایی پێشنیازێکی خستووەتەڕوو بۆ ئەوەی بەشێوەیەکی کاتی و قۆناغ بەقۆناغ مووچەی پلە نزمەکان زیاد بکرێت، بەبێ ئەوەی چاوەڕێی یەکلاکردنەوەی تەواوی یاسا گەورەکە بکرێت.

ئامانجی سەرەکی لەم هەنگاوە، کەمکردنەوەی ئەو جیاوازییە گەورەیەیە کە لەنێوان مووچەی وەزارەتە جیاوازەکاندا هەیە و دابینکردنی دادپەروەریی کۆمەڵایەتی بۆ ئەو فەرمانبەرانەی کە لە پلە وەزیفییە نزمەکاندا زۆرترین نادادپەروەرییان بەرامبەر کراوە، تاوەکو ئەو کاتەی بەربەستە یاساییەکانی بەردەم خشتەی گشتیی مووچە بەتەواوی لادەبرێن.