رێبەر ئەحمەد: چەندین داواكراو و بڕێكی زۆری پارەو زێڕمان رادەستی بەغدا کردووەتەوە

SNN-

وەزیری ناوخۆی حکومەتی هەرێمی کوردستان رایگەیاند، هەر داواکراوێک لەلایەن بەغداوە داوا کرابێت دەستگیرمان کردووە و ڕادەستمان کردوونەتەوە و دەشڵێت: بڕێکی زۆر پارە و زێڕ و موڵکیش دەستی بەسەردا گیراوە

لە لێدوانێکی رۆژنامەوانیدا، رێبەر ئەحمەد، وەزیری ناوخۆی هەرێمی كوردستان، ڕایگەیاند کە لە چوارچێوەی ڕووبەڕووبوونەوەی گەندەڵیدا، هەرچی داواکراوێک هەبووبێت لەلایەن بەغداوە دەستگیریان کردوون و ڕادەستیان کردوونەتەوە.

هەروەها ئاماژەی بەوە دا کە بڕێکی زۆری پارە و زێڕ و موڵک و ماڵی داواکراوان دەستی بەسەردا گیراوە و ڕادەستی بەغدا کراونەتەوە، و جەختی لەوەش کردەوە کە ئەوپەڕی هەماهەنگی لەسەر ڕاسپاردەی مەسعود بارزانی و سەرۆکی حکومەت هەیە و بەردەوامیش دەبن.

وەزیری ناوخۆ ئەوەشی خستەڕوو کە لە هەماهەنگیکردن لە بواری گەندەڵی و تیرۆر و مادەی هۆشبەردا هەمیشە جدی بوون و هەر داواکراوێکیش هەبێت هەمیشە هاوکار دەبن.