هەولێر: نرخی بەنزینی نۆرماڵ 250 دینار دابەزی

SNN-

 نرخی بەنزینی نۆرماڵی بازرگانی لە شاری هەولێر دابەزینی بەخۆیەوە بینی و نرخی هەر لیترێک بەنزین بە کۆ 250 دینار دابەزی و گەیشتە 1,400 دینار، ئەمەش وایکردووە لە بەنزینخانەکاندا نرخەکەی بۆ نێوان 1,550 تا 1,700 دینار داببەزێت.

جەنگی مەجید، سەرۆکی ئەنجوومەنی بەنزینخانەکانی هەولێر، ئەمڕۆ یەکشەممە 30ی ئاب ڕایگەیاند: نرخی لیترێک بەنزین بە کۆ دابەزیوە بۆ هەزار و 400 دینار، واتە هەر لیترێک 250 دینار دابەزیوە.

بە پێی بەدواداچوونەکان، نرخی بەنزین لە بەنزینخانەکانیشدا دابەزیوە بە جۆرێک لە هەندێک بەنزینخانە لیترێک بەنزینی نۆرماڵ 1550 دینارە، و لە بەشێکی تریاندا کە هێشتا بەنزینی پێشوویان ماوە، لیتری لە نێوان 1600 بۆ 1700 دینارە.

لە لایەکی ترەوە، لە پارێزگاکانی سلێمانی و هەڵەبجە نرخەکان جێگیرن و بەراورد بە هەولێر هەرزانترن، بە جۆرێک نرخی بەنزینی نۆرماڵ لەو پارێزگایانە لە نێوان 1,200 بۆ 1,350 دیناردایە، هاوکات پارێزگای دهۆکیش هاوشێوەی هەولێر نرخەکانی بەرەو دابەزین چووە.