جەی دی ڤانس: وەڵامی توندی هەنگاوەکانی ئێران دەدەینەوە

SNN-

جێگری سەرۆکی ئەمریکا، جەی دی ڤانس، لە لێدوانێکدا تیشکی خستە سەر دوایین پەرەسەندنە ئەمنیی و سەربازییەکانی ناوچەی کەنداو و گەرووی هورمز، و رایگەیاند کە وڵاتەکەی هەنگاوی کردەیی ناوه بۆ پاراستنی ئازادیی جووڵەی بازرگانی و ڕێگریکردن لە هەر هەوڵێک بۆ پەکخستنی دابینکردنی وزە.

ڤانس ئاشکرای کرد، که شەوی ڕابردوو هێزە ئەمریکییەکان هێرشیان ئەنجامداوە وەک وەڵامێکی ڕاستەوخۆ بۆ ئەو ئامادەکارییانەی کە لایەنی ئێرانی دەستی پێکردبوو مەبەست لێی چاندنی مین بووە لە ناوچەکەدا.

سەبارەت بە هەڵسوکەوتی سیاسی و سەربازیی تاران، جێگری سەرۆکی ئەمریکا ڕەخنەی تووندی لە سەرکردایەتیی ئێران گرت و دیاری کرد کە ئەوان بێ هیچ لێکدانەوەیەکی ستراتیژیی ڕوون، ئامادەن هەموو ڕێکارێک بگرنە بەر بۆ پەکخستنی هەناردەی نەوت و گاز. ناوبراو ئاماژەی بەوەش دا کە ئیدارەکەیان پێشبینیی ئەوەی دەکرد کە ئێران هەنگاوی لەو شێوەیە بنێت و تەنانەت ئەوەشی خستەڕوو که جێی سەرسوڕمانە ئێران ڕەنگە تەقە لە هاوپەیمانەکانی خۆیشی بکات بە مەبەستی ڕێگریکردن لە ئازادیی هەناردەکردنی وزە.

لە تەوەرێکی تری قسەکانیدا، ڤانس تیشکی خستە سەر سیاسەتی وزەی ئیدارەی ترەمپ و ئەوەی لە ڤەنزوێلا ئەنجامدرا، بەوەی کە ئەم هەنگاوانە دەبنە هۆی فرەچەشنکردنی سەرچاوەکانی وزە و لە هەمان کاتدا توانای ئێران و لایەنەکانی دیکە بۆ کۆنترۆڵکردنی سەرچاوە سروشتییەکان و بەکارهێنانیان وەک کارتی فشار سنووردار دەکەن.