مووچە
SNN
بڕیارە سبەی یەکشەممە لیستی مووچەی مانگی 9 و تەرازووی پێداچوونەوەی مانگی 8 رادەستی وەزارەتی دارایی عێراق بکرێت، بەهۆی نەبوونی کێشەی نەختینەش، پێشبینی دەکرێت دوای تەواوبوونی وردبینییەکان راستەوخۆ پارەکە خەرج بکرێت.
هۆکاری رادەستنەکردنی لیستەکە لە هەفتەی رابردوودا
ئەمڕۆ شەممە 3ـی تشرینی یەکەمی 2026، بەپێی زانیارییەکان لە بەغدا، سەرەڕای ئەوەی لیستی نوێی مووچەی فەرمانبەرانی هەرێمی کوردستان لە هەفتەی رابردوودا ئامادە کرابوو، بەڵام بەهۆی پشووی فەرمیی رۆژانی چوارشەممە و پێنجشەممەوە، ناردن و رادەستکردنی لیستەکە بۆ وەزارەتی دارایی عێراق دواکەوت.
رادەستکردنی لیستەکە و دەستپێکردنی وردبینی
بڕیارە سبەی یەکشەممە بە فەرمی لیستی مووچەی مانگی 9 و تەرازووی پێداچوونەوەی مانگی 8 رادەستی وەزارەتی دارایی عێراق بکرێت. دوای وەرگرتنی، وەزارەتی دارایی عێراق راستەوخۆ دەست بە پرۆسەی وردبینی لە لیستەکەدا دەکات و چاوەڕوان دەکرێت لە ماوەی چەند رۆژێکدا وردبینییەکان کۆتاییان بێت.
چارەسەربوونی کێشەی نەختینە لە بەغدا
پرۆسەی تەمویلکردنی مووچەی فەرمانبەرانی وەزارەتەکانی عێراق بەهۆی پشووەکانەوە راگیرابوو، بەڵام پێش پشووەکە بەشێکی زۆری وەزارەتەکان مووچەکانیان وەرگرتبوو. هەروەها بەراورد بە مانگی رابردوو، عێراق لەم مانگەدا کێشەی نەختینەی کەمترە و پارەی پێویستی لەبەردەستدایە، بۆیە بەهۆی زوو دەستپێکردنی دابەشکردنی مووچە لە عێراق، پێشبینی دەکرێت راستەوخۆ دوای وردبینی، تەمویلی مووچەی هەرێمی کوردستان بکرێت.
بڕی پارەی خەرجکراوی مانگی رابردوو
لە رۆژی دووشەممە 14ـی ئەیلوولی 2026، وەزارەتی دارایی عێراق بڕی 831 ملیار و 666 ملیۆن دیناری وەک شایستەی مووچەی مانگی 8ـی فەرمانبەران و مووچەخۆرانی هەرێمی کوردستان خستە سەر هەژماری بانکیی وەزارەتی دارایی حکوومەتی هەرێمی کوردستان.
