دۆناڵد ترەمپ: ئێران بە کردەیی دەستبەرداری سەرجەم پلانەکانی بووە بۆ بەدەستهێنانی چەکی ئەتۆمی
SNN
سەرۆکی ئەمریکا ئاشکرای دەکات کە بەمزووانە بڕیاری یەکلاکەرەوە لەبارەی ئێران دەدات و رایدەگەیەنێت، تاران لەژێر گوشارەکانی واشنتندا پاشەکشەی لە هەوڵەکانی بۆ دەستڕاگەیشتن بە چەکی ئەتۆمی کردووە.
بڕیارەکانی واشنتن لەبارەی تاران
بەرەبەیانی ئەمڕۆ یەکشەممە 4ـی تشرینی یەکەمی 2026، دۆناڵد ترەمپ، سەرۆکی ئەمریکا لە لێدوانێکی رۆژنامەوانیدا رایگەیاند، چەند بڕیارێکی لەبارەی ئێران لەبەردەستدایە و بەمزووانە بڕیاری کۆتایی لەبارەیانەوە دەدات. ترەمپ جەختی لەوە کردەوە کە بڕیارەکان چ بە رێگەی ئاسان بێت یاخود بە رێگەی سەخت، جێبەجێیان دەکەن.
دۆخی ئێران و رێگریکردن لە بەدەستهێنانی چەکی ئەتۆمی
سەرۆکی ئەمریکا ئاماژەی بەوە کرد کە ئێران لە ئێستادا وێران بووە و تاکە پرسیار ئەوەیە ئایا بەخۆشی و بە شێوازێکی ئاسان مەرجەکان قبووڵ دەکات، یان بە ناخۆشی و سەختی. ترەمپ روونیکردەوە کە بە هەر کام لەو دوو رێگەیە بێت ئامانجەکەیان دەپێکن، چونکە نابێت بە هیچ جۆرێک رێگە بدرێت ئێران ببێتە خاوەنی چەکی ئەتۆمی.
کاریگەریی گوشارەکان لەسەر بەرنامەی ئەتۆمی
دۆناڵد ترەمپ دووپاتی کردەوە کە گوشارەکانی واشنتن بۆ سەر تاران ئەنجامی کردارییان هەبووە و رایگەیاند، ئێستا ئێران بە کردەیی دەستبەرداری سەرجەم پلان و هەوڵەکانی بووە بۆ بەدەستهێنانی چەکی ئەتۆمی و پاشەکشەی لێ کردووە.
رەخنە لە دیموکراتەکان و بەراوردی نرخی نەوت
لە بەشێکی دیکەی قسەکانیدا، سەرۆکی ئەمریکا هێرشی کردە سەر سیاسەتەکانی ئیدارەی پێشوو و دیموکراتەکان، بەوەی بەهۆی سیاسەتە هەڵەکانی ئەوانەوە رووبەڕووی هەڵاوسان و نرخی بەرز بووبووەوە، بەڵام لە ئێستادا نرخەکان دابەزیون و نرخی نەوتیش زۆر لە سەردەمی ئیدارەی جۆ بایدن نزمترە. ترەمپ ئەوەشی خستەڕوو کە ئیدارەی پێشوو هیچ هەنگاوێکی کردارییان بۆ رێگریکردن لە چەکداربوونی ئەتۆمیی ئێران نەنابوو.
