لۆگۆی وەزارەتی خوێندنی باڵا
SNN
وەزارەتی خوێندنی باڵا و توێژینەوەی زانستیی هەرێمی کوردستان، ئەمڕۆ لە کۆنگرەیەکی رۆژنامەوانیدا ئەنجامی وەرگرتنی دەرچووانی پۆلی 12 لە زانکۆ و پەیمانگەکان بۆ ساڵی خوێندنی 2026-2027 رادەگەیەنێت.
کۆنگرەی رۆژنامەوانی و راگەیاندنی ئەنجامەکان
ئەمڕۆ یەکشەممە 4ـی تشرینی یەکەمی 2026، وەزارەتی خوێندنی باڵا و توێژینەوەی زانستیی حکوومەتی هەرێمی کوردستان، لە رێگەی کۆنگرەیەکی رۆژنامەوانییەوە ئەنجامی وەرگرتنی دەرچووانی پۆلی 12ـی ئامادەیی لە زانکۆکانی هەرێمی کوردستان بۆ ساڵی نوێی خوێندنی 2026-2027 رادەگەیەنێت.
دەستپێکردنی دەوامی قۆناغی یەکەم و پەیوەندیکردن بە زانکۆکان
بەپێی راگەیەندراوی وەزارەتی خوێندنی باڵا، راستەوخۆ دوای بڵاوکردنەوەی ئەنجامی زانکۆلاین، پرۆسەی خوێندنی قۆناغی یەکەم لە زانکۆکان دەستپێدەکات. بۆ ئەم مەبەستەش داوا لە وەرگیراوان کراوە دوای راگەیاندنی ئەنجامەکان پەیوەندی بە زانکۆکانیانەوە بکەن، هاوکات زانکۆکانی هەرێمی کوردستان سەرجەم ئامادەکارییە پێویستەکانیان تەواو کردووە بۆ پێشوازیکردن لە وەرگیراوانی تازە بۆ ساڵی نوێی خوێندن.
وادەی کاراکردن و داخستنی سیستەمی زانکۆلاین
پرۆسەی پێشکەشکردن لە 17ـی ئەیلوولی 2026 بە کاراکردنی سیستەمی زانکۆلاین بۆ دەرچووانی پۆلی 12ـی ئامادەیی لە سەرجەم بەشەکانی زانستی، وێژەیی، پیشەیی و قوتابخانە نێودەوڵەتییەکان دەستیپێکرد، دواتریش لە کاتژمێر 12ـی شەوی 26ـی هەمان مانگ دەرگای پڕکردنەوەی فۆڕمەکە داخرا.
ئاماری بەشداربووان بەپێی بەشە جیاوازەکان
بۆ ساڵی خوێندنی ئەمساڵ، 40 هەزار و 716 دەرچوو لە بەشە جیاوازەکان مافی پڕکردنەوەی فۆڕمی زانکۆلاینیان هەبووە. بەشێوەیەک کە 30 هەزار و 847 دەرچوو لە بەشی زانستی، 7 هەزار و 923 دەرچوو لە بەشی وێژەیی، 1 هەزار و 240 دەرچوو لە ئامادەییە پیشەییەکان و 706 دەرچووش لە قوتابخانە نێودەوڵەتییەکان بوون.
