عەلی زەیدی: عێراق دەوڵەتێکە خاوەنی بڕیاری خۆیەتی و چەک تەنها لەژێر دەسەڵاتی فەرماندەی گشتیدایە

SNN-

 بە بۆنەی رۆژی 3ی تشرینی یەکەمی 2026و بە بۆنەی جەژنی نیشتمانیی کۆماری عێراقەوە، عەلی زەیدی، سەرۆک وەزیرانی عێراق: پەیامێکی ئاراستەی گەلی عێراق کرد و تێیدا جەختی لەسەر سەروەریی وڵات، تەواو بوونی قۆناغی کشانەوەی هێزە سەربازییەکان، و هەنگاونان بەرەو گەشەپێدانی ئابووری و سەقامگیری کردەوە.

یادی سەربەخۆیی و مێژوو

 سەرۆکوەزیرانی عێراق پیرۆزبایی لە گەلی عێراق کرد بە بۆنەی تێپەڕبوونی زیاتر لە 90 ساڵ بەسەر دانپێدانانی عێراق وەک وڵاتێکی سەربەخۆ، وە یادیشی کردەوە کە عێراق یەکەم وڵاتی عەرەبی بووە پەیوەندی بە کۆمەڵەی گەلانەوە کردبێت و بەشدار بووبێت لە دامەزراندنی نەتەوە یەکگرتووەکاندا. هەروەها ئاماژەی بەوەدا کە مێژووی عێراق کۆنترە و لانکەی شارستانیەت و نووسین و یاسا بووە.

تەواوبوونی سەروەری و دۆخی ئەمنی

 لە پەیامەکەدا جەخت کرایەوە کە لە 30ی ئەیلوولی 2026دا، باڵادەستی و سەروەریی عێراق بە کۆتاییهاتنی ئەرکی سەربازیی هاوپەیمانی نێودەوڵەتی تەواو بووە، و ئێستا عێراق دەوڵەتێکە خاوەنی بڕیاری خۆیەتی و زەوی و ئاسمانی دەپارێزێت، لەگەڵ ئەوەی چەک تەنها لەژێر دەسەڵاتی فەرماندەی گشتیی هێزە چەکدارەکاندایە.

ڕووبەڕووبوونەوەی ئاستەنگەکان و سیاسەتی دەرەکی

 سەرەڕای ئاڵۆزیی بارودۆخی ناوچەیی و نێودەوڵەتی، عێراق بەردەوامە لە پەیڕەوکردنی سیاسەتێکی دەرەکیی هاوسەنگ لەسەر بنەمای بەرژەوەندیی نیشتمانیی باڵا و ڕێزگرتنی هاوبەش.

چاکسازیی ئابووری و پرۆژە ستراتیژییەکان

 حکومەت کار بۆ فرەجۆرکردنی ئابووری، بەهێزکردنی کەرتی تایبەت، دابینکردنی هەلی کار، و گواستنەوە بەرەو “بودجەی بەرنامە و کارکردن” دەکات. هەروەها پرۆژەکانی وەک دابەشکردنی یەک ملیۆن پارچە زەوی، دامەزراندنی سندوقی نەوەکان، و پڕۆژەی (ڕێگەی گەشەپێدان) بۆ کردنی عێراق بە ناوەندێکی بازرگانی و پردێک لەنێوان ڕۆژهەڵات و ڕۆژئاوا بە هەند وەرگیراون.

بەرەنگاربوونەوەی گەندەڵی و یەکڕیزیی نیشتمانی

 حکومەت سورە لەسەر بەردەوامبوون لە بەرەنگاربوونەوەی گەندەڵی و پاراستنی سامانی گشتی. لە کۆتاییشدا جەختکرایەوە کە پاراستنی یەکڕیزیی نیشتمانی و کۆمەڵایەتی گەورەترین پێویستیی ئێستایە بۆ تێپەڕاندنی قەیرانەکان و هێنانەدی دەوڵەتێکی دادپەروەر کە جێگەی هەمووان ببێتەوە.