هێڵی سێی دووکان - سلێمانی
SNN
بەڕێوەبەرایەتیی گشتیی ئاو و ئاوەڕۆی هەرێمی کوردستان دەستپێکردنی کارەکانی پڕۆژەی هێڵی سێی دووکان – سلێمانی رادەگەیەنێت و ئاماژە بەوە دەکات کە پڕۆژەی ئاوی گۆپتەپە – چەمچەماڵیش گەیشتووەتە قۆناغی پێشکەوتوو.
تەواوبوونی قۆناغی دیزاین و رەزامەندییەکان
ئەمڕۆ شەممە 3ـی تشرینی یەکەمی 2026، ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان رایگەیاند، پڕۆژەی هێڵی سێی دووکان – سلێمانی لە قۆناخی دیزاینکردن تەواو بووە و رەزامەندیشی لەسەر دراوە، لە ئێستاشدا بەش بەشی پڕۆژەکە بە وردەکاریی تەواوەوە دیزاینی ئەندازیاری بۆ دەکرێت.
دەستپێکردنی کارە مەیدانییەکان و ئاستی جێبەجێکردن
بەڕێوەبەری گشتیی ئاو و ئاوەڕۆ ئاشکرای کرد، لە هەندێک شوێنی پڕۆژەکە کاری هەڵکەندن دەستیپێکردووە و لە هەندێک شوێنی دیکەش کۆنکرێت کراوە. هەروەها ئیشوکارەکانی دانانی کەمپ و یەکلاییکردنەوەی رێڕەوی هێڵەکانی گواستنەوەی کارەبا و هێڵە سەرەکییەکانی ئاو تەواو بووە، کە لە دوو بۆڕیی سەرەکیی قەبارە 1400 ملیمەتری پێکدێن. هاوکات ژمارەیەکی زۆر کارمەند و ئامێری قورس لە شوێنی پڕۆژەکە سەرقاڵی کارکردنن و بە گشتی تاوەکو ئێستا 5%ـی تەواوی پڕۆژەکە جێبەجێ کراوە.
وادەی تەواوبوونی پڕۆژەی ئاوی گۆپتەپە – چەمچەماڵ
سەبارەت بە پڕۆژەی ئاوی گۆپتەپە – چەمچەماڵ، ئاری ئەحمەد ئاماژەی بەوە کرد کە کارکردن تێیدا بەردەوامە و 45%ـی کارەکانی تەواو بووە. ئەوەشی خستەڕوو کە ئەگەر هیچ گرفتێکی دارایی نەیەتە پێش، بەڵێن دراوە لە ماوەی 7 بۆ 8 مانگی داهاتوودا تەواوی پڕۆژەکە تەواو بکرێت و بکەوێتە کار.
