ئەبو ئالا وەلائی
SNN
ئەمینداری گشتیی کەتیبەکانی سەیدولشوهەدا رایدەگەیەنێت ئاسایشی هەرێمی کوردستان بەشێکە لە ئاسایشی عێراق و کشانەوەی هێزەکانی ئەمریکا نابێت جێگەی دڵەڕاوکێ بێت، ئەمەش هاوکاتە لەگەڵ ئەوەی لە مانگەکانی رابردوودا بە زیاتر لە هەزار مووشەک و درۆن هێرش کراوەتە سەر هەرێمی کوردستان.
پەیامی وەلائی بۆ هەرێمی کوردستان و گرنگیی ئاسایش
بەرەبەیانی رۆژی شەممە 3ـی تشرینی یەکەمی 2026، ئەبو ئالا وەلائی، ئەمینداری گشتیی کەتیبەکانی سەیدولشوهەدا، لە راگەیەندراوێکدا پیرۆزبایی لە خەڵکی عێراق کرد بەبۆنەی تەواوبوونی سەروەریی نیشتمانی و سەربەخۆیی بڕیاری عێراق. لە پەیامێکیشدا بۆ هەرێمی کوردستان گوتی، ئاسایش و سەقامگیریی هەرێمی کوردستان بەشێکی دانەبڕاوە لە ئاسایش و سەقامگیریی عێراق و هەر هەڕەشەیەک رووبەڕووی هەرێم ببێتەوە، ئەرکێکی نیشتمانییە هەموو لایەک بایەخی پێبدەن. داواشی کرد کشانەوەی ئەمریکا نەبێتە هۆی نیگەرانی، بەڵکو وەک دەرفەتێک بۆ سەلماندنی توانای عێراقییەکان لە پاراستنی خاک و سەروەریی خۆیان لێک بدرێتەوە.
هەڵوێست لەسەر دانپێدانانەکانی سەرۆکی ئەمریکا
ئەمینداری گشتیی کەتیبەکانی سەیدولشوهەدا ئاماژەی بەوە کرد، دانپێدانانی سەرۆکی ئەمریکا بە قەبارەی زیانە مرۆییەکانیان و وەسفکردنی بوونیان لە عێراق بە “زۆنگاو و دۆزەخ”، بەڵگەیە لەسەر راستیی هێز و وردیی ئۆپەراسیۆنەکانی مقاوەمەی عێراق، پێچەوانەی ئەو بۆچوونانەی کە هەوڵیان دەدا بایەخی ئەو چالاکییانە کەم بکەنەوە.
کۆتاییهاتنی وادەی ئەرکی هاوپەیمانان لە عێراق
ئەم لێدوانانەی ئەبو ئالا وەلائی، وەک یەکێک لە سەرکردە دیارەکانی بەرەی مقاوەمەی ئیسلامی لە عێراق، دوای ئەوە دێت کە رێککەوتی 30ـی ئەیلوولی 2026 دوا وادەی دیاریکراو بوو بۆ کۆتاییهاتنی ئەرکی هاوپەیمانیی نێودەوڵەتی لە سەرانسەری عێراقدا.
ئاماری هێرشە درۆنی و مووشەکییەکان بۆ سەر هەرێمی کوردستان
لە 28ـی شوباتی ئەمساڵەوە بەهۆی دەستپێکردنی جەنگی نێوان ئەمریکا و ئیسرائیل لەگەڵ ئێران، زیاتر لە 1000 درۆن و مووشەک ئاراستەی هەرێمی کوردستان کراون کە بەشێکی بەرچاویان لەلایەن گرووپەکانی سەر بە مقاوەمەی ئیسلامییەوە بووە. ئەو گرووپانە پێش دەستپێکردنی ئەم جەنگەش دەیان جار هێرشیان کردووەتە سەر هەرێمی کوردستان و زیانی ماددی گەورەیان بە ژێرخانی ئابووری، بەتایبەت کەرتی نەوت و گاز گەیاندووە.
