وەزارەتی نەوتی هەرێم و عێراق
SNN
هاوپەیمانیی ئۆپێک پڵەس پێداچوونەوە بە پشکی بەرهەمهێنانی نەوتی وڵاتان بۆ ساڵی 2027 دوادەخات، وەزارەتی نەوتی عێراقیش رایدەگەیەنێت بڕیارەکان لەسەر ئاستی بەرهەمهێنانە و کێڵگەکانی هەرێمی کوردستانیش دەگرێتەوە.
دواخرانی بڕیارەکەی ئۆپێک پڵەس بەهۆی گرژیی ناوچەکەوە
ئۆپێک پڵەس بڕیاری دا پێداچوونەوە بە بڕی بەرهەمهێنانی وڵاتانی ئەندام بۆ ساڵی 2027 دوابخات، ئەمەش بەهۆی ئەو دۆخە نائاساییەی لە ناوچەکەدا هاتووەتە ئاراوە. بەپێی وادەی دیاریکراو، دەبوو ئەم پێداچوونەوەیە تاوەکو کۆتایی مانگی ئەیلوولی 2026 تەواو ببێت، بەڵام بەهۆی جەنگی نێوان ئەمریکا و ئێرانەوە وادەکە بۆ نێوەڕاستی مانگی تشرینی دووەمی 2026 دواخراوە.
رادەستکردنی داتاکان و سنووردارکردنی بەرهەمهێنان لە هەرێمی کوردستان
رۆژی شەممە 3ـی تشرینی یەکەمی 2026، سەلیم روکابی، گوتەبێژی وەزارەتی نەوتی عێراق رایگەیاند، سەرجەم ئەو زانیارییانەی داواکرابوون رادەستی ئەو کۆمپانیا راوێژکارییە کراون کە ئەرکی داڕشتنەوەی بڕی بەرهەمهێنانی وڵاتانی ئەندامی پێسپێردراوە. روکابی جەختیشی کردەوە کە بڕیارەکانی سنووردارکردنی ئۆپێک پڵەس لە بواری بەرهەمهێناندایە نەوەک هەناردەکردن، هەربۆیە دیاریکردنی ئەو بڕە کێڵگەکانی نەوتی هەرێمی کوردستانیش دەگرێتەوە.
قەبارەی هەناردەی رۆژانەی نەوت لە باشوور و هەرێمی کوردستان
گوتەبێژی وەزارەتی نەوت ئاماژەی بەوە کرد، عێراق لە ئێستادا رۆژانە نزیکەی 2 ملیۆن و 650 هەزار بەرمیل نەوت هەناردە دەکات. لەو بڕەش تێکڕا 2 ملیۆن و 400 هەزار بەرمیلی لە رێگەی بەندەرەکانی باشوورەوە دەنێردرێت و 250 هەزار بەرمیلیشی لە رێگەی هەرێمی کوردستانەوە رەوانەی بەندەری جەیهانی تورکیا دەکرێت، کە 140 هەزار بەرمیلی هی کێڵگەکانی هەرێمی کوردستانە، 40 هەزار بەرمیلی لە کێڵگەکانی کەرکووکەوەیە، هەروەها رۆژانە بەشێوەیەکی گۆڕاو بڕی 70 بۆ 100 هەزار بەرمیل نەوتی بەسرەش رەوانەی کەرکووک دەکرێت بۆ هەناردەکردن.
پلانەکانی عێراق بۆ بەرهەمهێنانی 10 ملیۆن بەرمیل تاوەکو ساڵی 2030
عێراق ئامانجییەتی تاوەکو ساڵی 2030 قەبارەی بەرهەمهێنانی نەوت بگەیەنێتە نزیکەی 10 ملیۆن بەرمیل لە رۆژێکدا. لەم چوارچێوەیەدا، لە کۆبوونەوەیەکدا لە بەغدا لە 1ـی ئەیلوولی 2026، عەلی فالح زەیدی، سەرۆکوەزیرانی عێراق کۆمەڵێک بڕیار و رێنمایی دەرکرد بە مەبەستی زیادکردنی بەرهەمهێنان لە کێڵگە نەوتییەکاندا تاوەکو لەو وادەیەدا بگەنە ئەو ئامانجە دیاریکراوە.
