وەزیری دارایی عێراق: پابەندین بە دابینکردنی مووچە لە هەر 30 ڕۆژ جارێکدا

SNN-

وەزیری دارایی عێراق لە بەردەم پەرلەمانی عێراق ڕایگەیاند، حکومەتی فیدراڵ پابەندە بە دابینکردنی مووچەی مانگانەی مووچەخۆران لە هەر 30 ڕۆژ جارێکدا.

داهاتی نانەوتی زیاد دەکات

فالح ساری، وەزیری دارایی عێراق ئاشکرای کرد، خەرجیی مانگانەی مووچەی مووچەخۆران گەیشتووەتە 7.7 تریلیۆن دینار. سەبارەت بە داهاتەکانی دەوڵەتیش ئاماژەی بەوە کرد، ڕێژەی داهاتی نانەوتی لە بودجەی ساڵی ڕابردوودا 11% بووە، بەڵام بەپێی پلانەکان لە بودجەی ساڵی داهاتوودا دەگاتە 19%.

سەبارەت بە ڕێکارەکانی حکومەت بۆ ئابووری، وەزیری دارایی ڕوونی کردەوە کە کۆمەڵێک هەنگاوی جدی گیراونەتەبەر، لەوانە دابینکردنی 1 تریلیۆن دینار بۆ کەرتی نیشتەجێبوون بەمەبەستی بوژاندنەوەی ئابووری و دابینکردنی شوێنی نیشتەجێبوون.

دابەزاندنی بەهای دینار بژاردەیەکی ناچاری بوو

ئەم لێدوانەی فالح ساری لە کاتێکدایە کە شەوی رابردوو لەگەڵ عەلی زەیدی، سەرۆکی ئەنجومەنی وەزیران و پارێزگاری بانکی ناوەندی ئامادەی  چوونە پەرلەمانی عێراق بەمەبەستی خستنەڕووی ڕوونکردنەوە لەسەر دابەزاندنی بەهای دیناری عێراقی بەرامبەر دۆلاری ئەمریکی. لەو دانیشتنەدا سەرۆکوەزیران جەختی کردەوە کە دابەزاندنی بەهای دینار بژاردەیەکی ناچاری بووە بەمەبەستی ڕێگری لە بژاردەی خراپتر و دەربازبوون لەو دۆخە سەختە داراییەی ڕووی لە وڵات کردووە.