SNN-
ئەمڕۆ دووشەممە 12-10-2026، دیداری ساڵانەی مێری (MERI Forum) لە شاری هەولێر دەستپێدەکات، کە تێیدا سەرکردە سیاسییەکان، داڕێژەرانی سیاسەت، ئەکادیمیستان، دیپلۆماتکاران، باڵیۆز و کۆنسوڵخانەکان کۆدەبنەوە بۆ تاوتوێکردنی ئەو پرسانەی کاریگەرییان لەسەر عێراق، هەرێمی کوردستان و ڕۆژهەڵاتی ناوەڕاست بەگشتی هەیە.
بەگوێرەی ئەجێندای ڕۆژی یەکەمی دیدارەکە، کاتژمێر 11:20 خولەکی پێشنیوەڕۆ، بافڵ جەلال تاڵەبانی، سەرۆکی یەکێتی، لە پانێڵێکدا بە ناونیشانی “بوونیادنانی کوردستانێکی بەهێزتر؛ یەکڕیزیی و ئاسایش و هاوبەشی هەرێمی” قسە دەکات و گفتوگۆی لەبارەوە دەکرێت.
هەر لە چوارچێوەی کارنامەی ڕۆژی یەکەم و لە پاش نیوەڕۆدا، نێچیرڤان بارزانی، سەرۆکی هەرێمی کوردستان، پانێڵی دەبێت و ژمارەیەک کۆنسوڵی وڵاتانیش قسە دەکەن.
دیداری مێری کۆنفرانسێکی سیاسیی باڵایە لە عێراق کە لە پاییزی هەموو ساڵێکدا لەلایەن ئینستیتیوتی ڕۆژهەڵاتی ناوەڕاست بۆ توێژینەوە (MERI) ڕێکدەخرێت و بافڵ جەلال تاڵەبانیش چەند ساڵێکە یەکێکە لە قسەکەرە تایبەتەکانی.
