SNN-

باراک ئۆباما، سەرۆکی پێشووتری ئەمریکا، ڕەخنەی توندی لە ئیدارەی دۆناڵد ترەمپ گرت و ڕایگەیاند؛ جەنگی ئێران بە تەواوی ناپێویست بوو، جگە لە  گیانلەدەستدانی سەربازانی ئەمریکی، بووەتە هۆی کەمبوونەوەی کۆگاکانی مووشەکی ئەمریکا و کەوتنی گەرووی هورمز بۆ ژێر دەسەڵاتی تاران.

ئۆباما لە میانی ئامادەبوونی لە کۆبوونەوەیەکی هەڵبژاردندا لە شارۆچکەی کلیڤلاندی ویلایەتی ئۆهایۆ، تیشکی خستە سەر زیانە سەربازی و ئابوورییەکانی ئەو ناکۆکییە و ئاماژەی بەوە کرد، بە تێپەڕبوونی حەوت مانگ بەسەر دەستپێکردنی جەنگەکەدا، جگە لە کوژرانی سەربازانی ئەمریکی و برینداربوونی سەدان کەسی دیکە، کۆگاکانی مووشەکی وڵاتەکەشیان تووشی کەمیی بەرچاو بوونەتەوە.

سەرۆکی پێشووتری ئەمریکا جەختیشی کردەوە، سەرەڕای بانگەشەکانی سەرەتای بەرپرسانی ئیدارەی ترەمپ سەبارەت بە سەرکەوتنی خێرا، بەڵام ئێستا ئێران دەسەڵات و توانای تەواوی بەسەر گەرووی هورمزدا سەپاندووە، کە ڕێڕەوی سەرەکی  گواستنەوەی نەوتی جیهانە.

لە بەشێکی دیکەی قسەکانیدا، ئۆباما باسی لە کاریگەرییە ئابوورییەکانی ئەم جەنگە کرد لەسەر ژیانی ڕۆژانەی هاووڵاتییان و جەختی کردەوە کە بەرزبوونەوەی نرخەکانی سووتەمەنی و کاڵا سەرەکییەکان پەیوەندیی ڕاستەوخۆیان بە سەرهەڵدانی ئەم ئاڵۆزییە سەربازییانەوە هەیە.

لە کۆتاییدا، باراک ئۆباما بەراوردی لە نێوان سیاسەتی دەرەوەی ئیدارەکەی خۆی و ئیدارەی ترەمپ کرد و ڕەخنەی لە کشانەوەی واشنتن لە ڕێککەوتننامە ئەتۆمییەکەی ساڵی 2015 گرت و وتی: “لە ئیدارەکەی ئێمەدا، بەبێ تەقاندنی هیچ مووشەکێک و تەنها لە ڕێگەی دیپلۆماسییەوە توانیبوومان ڕێگری لە دەستگەیشتنی ئێران بە چەکی ئەتۆمی بکەین.“