كۆرۆنا خهون و ئامانجهكانى یاسر قاسم لهگۆڕ دەنێت
یاسر قاسم
سهنگهر زرار- SNN Sport
پاش ههڵوهشاندنهوهى خولى نایابى تۆپى پێى یانهكانى عێراق بۆ وهرزى 2019-2020، بههۆى بڵاوبوونهوهى ڤایرۆسى كۆرۆنا (كۆڤید 19)، یاسر قاسم بۆندهكهى لهگهڵ تیپى تۆپى پێى یانهى وهرزشى ههولێر ههڵوهشاندهوه و سهر لهنوێ دهگهڕێتهوه لهندهن.
بهپێى ههواڵى میدیا عێراقییهكان، یاسر قاسم یاریزانى پێشووى ههڵبژاردهى تۆپى پێى عێراق كه بهئامانجى ئهوه گهڕایهوه عێراق و پهیوهندى بهتیپى تۆپى پێى یانهى ههولێر-هوه كرد تا دووباره بگاتهوه بهڕیزى ههڵبژاردهى یهكهمى عێراق، بهڵام ڤایرۆسى كۆرۆنا كۆتایی بهخهون و ئامانجهكانى هێنا و ئهمیش كۆتایی بهبۆندهكهى لهگهڵ یانهكهى هێناوه و بۆندهكهى ههڵوهشاندۆتهوه كه بۆ ماوهى یهك ساڵه و سهرلهنوێ دهگهڕێتهوه لهندهن.
لهمبارهیهوه تۆڕى ههواڵى سلێمانى (SNN Sport) بۆ پشتڕاستكردنهوهى ئهم ههواڵه پهیوهندى بهیانهى وهرزشى ههولێر-هوه كرد و سهرچاوهیهك لهیانهكه ئهوهى پێ راگهیاندین كه پاش ههڵوهشاندنهوهى یارییهكانى وهرزى 2019-2020ى خولى نایابى تۆپى پێى یانهكانى عێراق بههۆى تهشهنهسهندنى ڤایرۆسى كۆرۆنا و بهكۆدهنگى سهرجهم یانهكان، بابهتى بۆندى یاریزانانى یانهى وهرزشى ههولێر و تهواوى یانهكانى ترى بهشدار لهخولهكه هێشتا یهكلانهكراوهتهوه و وهك قسهى لێكراوه ئهو پرسه دهستهى كاتى بۆ بهڕێوهبردنى یهكێتى تۆپى پێى عێراق یهكلایی دهكاتهوه، نهك پرسى یاریزانان، بهڵكو پرسى راهێنهرانیش ئهوان دهبنه نێوهندگیر لهنێوان یانهكان لهلایهك و یاریزانان و راهێنهرانیش لهلایهكى تر”.
ههروهها سهرچاوهكه ئهوهشى وت كه ئهوان ناتوانن هیچ شتێك لهسهر ئهوه بڵێن و هیچ قسهیهكیان نییه و ناتوانن تاك لایهنهش بڕیار بدهن، تهنها چاوهڕێى بڕیارى یهكێتى تۆپى پێى عێراق دهكهن و هێشتا هیچ شتێك دیار و روون نییه كه ئهوان لهمبارهیهوه چ بڕیارێك دهدهن”.
پێشووتریش لهسهر ئهم پرسه، د.ئهحمهد كۆچهر-ى ئهندامى دهستهى كاتى بۆ بهڕێوهبردنى یهكێتى تۆپى پێى عێراق-ى لهمیانهى دیدارێكیدا لهگهڵ تۆڕى ههواڵى سلێمانى (SNN Sport)، سهبارهت بهكێشهى بۆندى یاریزانان و راهێنهران لهگهڵ یانهكان، ئهوهى ئاشكراكردبوو كه ئهوان وهك دهستهكهیان دهبنه ناوبژیوان لهنێوان یاریزانان و یانهكان ههروهها راهێنهران و یانهكان.
یاسر قاسم-ى تهمهن 29 ساڵ سهرهتاى مانگى شوباتى ئهمساڵ بهپێى بۆندێك بۆ ماوهى یهك ساڵ پهیوهندى بهتیپى تۆپى پێى یانهى وهرزشى ههولێرهوه كرد بهئامانجى نوێنهرایهتى كردن و یارمهتیدانى یانهكه لهخولى نایابى یانهكانى عێراق و لهگهڵ تیپهكهشدا 5 یارى لهخولهكه ئهنجامدا.
یاسر قاسم
