پرسی دامەزراندنەکەی مامۆستایانی کەرکوک چارەسەردەکرێت

SNN-عیماد جەباری

بڕیارە هەفتەی داهاتوو پرسی دامەزراندنی پەروەردەی کەرکوک بەیەکجاری چارەسەربکرێت و تێپەڕێندرێت کە ماوەیەکی زۆرە بەهۆی ناڕەزایی لای کورد و تورکمان دروستکردووە.

مەریوان نادر ئەندامی ئەنجومەنی نوێنەرانی عێراق بە  SNNی راگەیاند، لەگەڵ وەزیری پەروەردەی عێراق لەبارەی پرسی دامەزراندنەکەی پەروەردەی کەرکەک گفتوگۆمان کرد و رێککەوتین رۆژی دووشەممەی هەفتەی داهاتوو ئەو بابەتە تێپەڕێندرێت بچێتە بواری جێبەجێکردنەوە کە دوو هەزار و 841 پلەی دامەزراندنە.

سەبارەت بە داواکاری خوێندنی کوردی بۆ گواستنەوەی راژەکانیان لەهەرێمەوە بۆ بەغدا، ئەو پەرلەمانتارە کە ئەندامی لیژنەی پەروەردەی پەرلەمانە وتی، وەزیری پەروەردە بەڵێنی پێ داوین دیراسەی وردی پرسی گواستنەوەی راژەی مامۆستایانی خوێندنی کوردی لەسەر میلاکی هەرێمەوە بۆ سەر میلاکی ناوەند بکات بە مەبەستی چارەسەرکردنی.

ئەوە لەکاتێکدایە لەماوەی رابردوو نزیکەی سێ هەزار کەس وەک مامۆستا لە پەروەردەی کەرکوک ناویان هاتەوە بۆ دامەزراندن بەڵام راگەیاندنی ناوەکان نیگەرانی زۆری لێکەوتووە و بەشێک لە دەرچوان رایانگەیاند واستە و نادادپەروەری لە دامەزراندنەکەدا کراوە، بەو هۆیەشەوە چەندین خۆپیشاندانیان ئەنجامدا.

بەوهۆیەوە مانگی شوباتی رابردوو، لیژنەی وردبینی لە ئەنجومەنی نوێنەرانی عێراق کە لە سێ پەرلەمانتار پێکهاتوون، بڕیاریاندا دامەزراندنەکە هەڵوەشێندرێتەوە.

لە چەند هەفتەی رابردووشدا، مامۆستایانی خوێندنی کوردی لە کەرکوک گردبوونەوە و داوایانکرد راژەکانیان بخرێتە سەر حکومەتی ناوەند.