ژمارەیەک پزیشک و کارمەندی تەندروستی لەکەرکوک تووشی کۆرۆنا بوون

SNN- عیماد جەباری

ژمارەیەک پزیشک و کارمەندی پزیشکیی نەخۆشخانەی ئازادی لەکەرکوک لەپشکنینی خێرا دەرکەوت تووشبووی کۆرۆنان.

سەرچاوەیەک لەتەندروستی کەرکوک بە SNNی راگەیاند: شەوی رابردوو پشکنینی خێرای کۆرۆنا بۆ بەشێک لەپزیشک و کارمەندانی پزیشکی نەخۆشخانەی ئازادی ئەنجاندراوە دەرکەوتوە دوو پزیشک و 8 کارمەند هەڵگری ڤایرۆسەکەن.

وتیشی: “تووشبووەکان پزیشکی موقیمن، نمونەی خوێنیان رەوانەی تاقیکردنەوەی ناوەندی کراوە تاوەکو دڵنیابین تووشبوون ئەو کاتە دەگوازرێنەوە بۆ سەنتەری تایبەت بەچارەسەری کۆرۆنا”.

لەچەند رۆژی رابردوویشدا دوو پزیشک لەنەخۆشخانەی حەویجە بەهەمان شێوە دەرکەوت تووشبووی کۆرۆنان و گواسترانەوە بۆ سەنتەری چارەسەر.

کۆی گشتی تووشبووانی کۆرۆنا لەکەرکوک گەیشتووەتە 213 حاڵەت، لەو ژمارەیەش 125 تووشبوو هێشتا چارەسەر وەردەگرن، 81 تووشبوویش چاکبوونەتەوەو 7 تووشبوویش گیانیان لەدەستداوە.