تائێستا 85 پزیشک و کارمەند لەسنوورى پارێزگاى سلێمانى تووشى کۆرۆنا بوون

SNN-هەوراز ئەحمەد
سەرۆکى لقى سلێمانى سەندیکاى کارمەندانى تەندروستى ڕایدەگەنێت “پزیشکان و کارمەندان لەپێشەوەى شەڕى ڕووبەڕووبوونەوەى ڤایرۆسى کۆرۆنا بە گیرفانى بەتاڵەوە دەجەنگن، بەڵام ئەوەش سنوورى خۆى هەیە”.

هاوژین عوسمان سەرۆکى لقى سلێمانى سەندیکاى کارمەندانى تەندروستى بە SNNى ڕاگەیاند “لەسەرەتاى سەرهەڵدانى کۆرۆناوە لە سنوورى پارێزگاى سلێمانى 85 پزیشک و کارمەندى تەندروستى و شوفێرى ئەمبۆڵانس تووشى ڤایرۆسەکە بوون و لەو ژمارەیە 14 کارمەندى تەندروستى و پزیشکێک کە دانیشتووى قەزاى کەلارە نزیکەى 60 یان دانیشتووى شارى سلێمانى بوون ئەوى دیکەشیان خەڵکى پێنجوین و هەڵەبجەن”.

وتیشى: “ئێمە وەک کارمەندانى تەندروستى شەڕى کۆرۆنا دەکەین و گەر سەردانێکى نەخۆشخانەکان بکەن دەبینن یەک پزیشکى تێدا نییە هەموویان ڕۆشتوونەتە ماڵەوە و بایکۆتى دەوامیان کردووە، ئەو خزمەتگوزارییەش کە پێشکەشدەکرێت لەلایەن کارمەندانى تەندروستییەوە بەڕێوە دەچێت و ئێمە نەخۆشخانەکانمان بە پێوە هێشتۆتەوە”.