ئابووری بەریتانیا تووشی گەورەترین پاشەکشە بووە

SNN

بە گوێرەی ئامارێکی فەرمی، ئابووری بەریتانیا لە مانگی نیسانی رابردوودا کە قەدەغەی هاتووچۆ بەڕێوەچووە، 20.4% پاشەکشەی کردووە کە ئەوە گەورەترین پاشەکشەیە لە مێژووی ئەو وڵاتەدا.

نوسینگەی ئاماری نیشتمانی (ONS)، کە دەزگایەکی حکومییە، قەبارەی ئەو پاشەکشەیەی ئاشکراکردووە و دەڵێت: “لەوەتەی ئاماری گەشەی ئابووری لە بەریتانیا تۆمارکراوە، تا ئێستا ئەو وڵاتە  هێندە پاشەکشەی نەکردووە”.

ئەو دەزگایە راشیگەیاندووە، پاشەکشەی ئابووری لە بەریتانیا لە مانگەکانی شوبات تا نیسان بە رێژەی %10.4 بووە.

ئەوە لەکاتێکدایە بەهۆی بڵاوبوونەوەی ڤایرۆسی کۆرۆناوە بەشێکی زۆر لە وڵاتانی ئەوروپا و جیهانیش قەدەغەی هاتووچۆیان راگەیاند و رێژەی بێکاریش بەشێوەیەکی بەرچاو بەرزبووەوە.