دۆخی تەندروستی تووشبوانی کۆڕۆنا لەراپەڕین جێگیرە پلازمای خوێنیش لە رزگاربوانی ڤایرۆسەکە وەردەگیرێت

SNN-محەمەد مستەفا

لە سنوری ئیدارەی راپەڕین 34 کەس تووشی ڤایرۆسی کۆرۆنا بوون و بەووتەی بەرپرسی راگەیاندنی تەندروستی راپەڕینیش ئامادەکاری دەکرێت بۆ وەرگرتنی پلازمای خوێن لەو تووشبووانەی کە لە نەخۆشیەکە چاکبوونەتەوە.

تەها محەمەد بەرپرسی راگەیاندنی تەندروستی راپەڕین بە SNN ی راگەیاند: لە سنوری ئیدارەی راپەڕین تا ئێستا 34 تووشبووی ڤایرۆسی کۆڕۆنا هەیە، لەبەرامبەریشدا 4 تووشبوو بەتەواوی لەو پەتایە چاکبوونەتەوە، لەئێستادا باری تەندروستی سەرجەم تووشبووانی سنوری ئیدارەی راپەڕین جێگیرە.

وتیشی ” لە کۆی سەرجەم تووشبووان تەنیا 3 تووشبوو ئامێری هەناسەدانی دەستکردیان بۆ دانراوە، هاوکات ئەمڕۆ شەممە 13ی حوزەیران، ژمارەیەکی زۆر سامپڵ لە کەسانی گومان لێکراوی ڤایرۆسەکە وەرگیراوە کە هەر ئەمشەو وەزارەتی تەندروستی ئەنجامەکەیان رادەگەیەنێت .

باسی لەوەشکرد : لە ئایندەیەکی نزیکدا تیمێکی تایبەتی تەندروستی راپەڕین دەست دەکات بە وەرگرتنی پلازمای خوێن لەو تووشبووانەی کە چاکبوونەتەوە بۆ ئەوەی چارەسەری تووشبووانی نوێی ڤایرۆسەکەی پێبکرێت.