400 ملیۆن پێکوتەی کۆرۆنا بۆ کۆمەڵێک وڵات دروستدەکرێت

SNN

کۆمپانیای ئەسترا زێنیکا پڵەس: رایگەیاند بەپێی رێککەوتنەکە 400 ملیۆن پێکوتەی دژی کۆرۆنا کە لە زانکۆی ئۆکسفۆردەوە پەرەی پێدراوە، دابیندەکرێت و لەماوەی ئەو پەتا جیهانییە، بەبێ قازانج بڵاویدەکەنەوە.

ئەمە یەکەم رێککەوتنی هاوشێوەیە لەلایەن هاوپەیمانیی گشتیی ڤاکسینەکانی ئەوروپا (IVA)، کە گرووپێکە پێکدێت لە: فەرەنسا، ئەڵمانیا، ئیتاڵیا و هۆڵەندا و کۆمپانیایەکی دەرمان واژۆدەکرێت. ئەو هاوپەیمانییە ئامانجییەتی ڤاکسین بۆ هەموو هاووڵاتیانی ئەندام لەو گرووپە دەستەبەر بکات.

پاسکال سۆریۆ، بەڕێوەبەری گشتیی هاوپەیمانییەکە رایگەیاند “ئەو رێککەوتنە دڵنیایی دەدات، کە ملیۆنان ئەوروپی ئەو ڤاکسینەیان پێدەگات. بەدڵنیاییەوە ئەگەر ڤاکسینەکە کاری خۆی بکات. لە کۆتایی ئەم هاوینە دەزانین”.

لە وتەکانیدا بۆ رۆژنامەوانان، پاسکال ئاماژە بەوەش دەکات “هیوایەکی باشم هەیە ئەو ڤاکسینە کاردەکات، ئەو هیوایەشم لەسەر بنەمای داتا سەرەتاییەکان هەڵچنیوە”.

هەریەک لە وڵاتانی: چین، بەرازیل، ژاپۆن و رووسیاش ویستی خۆیان بۆ دابینکردنی ئەو پێکوتەیە دەربڕیوە.

سۆریۆ هەروەها دەڵێ “ئاژانسی چاودێریی دەرمان و بەرهەمە تەندروستییەکانی بەریتانیا (MHRA) رازیبووە بە دەستپێکردنی قۆناغی یەکەمی تاقیکردنەوەی پێکوتەکە، ئەنجامەکەش دەریخستووە ئەو ڤاکسینە کاریگەر و سەلامەتە”.