کارمەندانى تەندروستى سلێمانی مانگرتنى گشتیان ڕاگەیاند

SNN-هەوراز ئەحمەد
سەرۆکى لقى سلێمانى کارمەندانى تەندروستى ئەمڕۆ مانگرتنى گشتى لە تەواوى ناوەندەکانى تەندروستى ڕاگەیاند جگە لە سەنتەرەکانى چارەسەر کردنى کۆرۆنا و فریاکەوتن.

هاوژین عوسمان، سەرۆکى لقى سلێمانى کارمەندانى تەندروستى ڕایگەیاند: “دۆخى تەندروستى سلێمانى لەوپەڕى خراپیدایە بەهۆى وەڵام نەدانەوەى حکومەت بە پێدانى مووچەکانمان، بڕیارماندا لە سەرجەم ناوەندەکانى تەندروستى مانبگرین و نەچینەوە سەر کارەکانمان”.

وتیشى: “لە ئێستادا تەنها سەنتەرەکانى کۆرۆنا و فریاکەوتن دەوامى تێدا دەکرێت ئەگەر لە ماوەیەکى کورتدا مووچە دابەش نەکرێت، ئەوا ئەو شوێنانەش دادەخەین، چونکە قوربانى سەرەکى ئێمەین لە پزیشکان و کارمەندان”.

سەبارەت بەو کارمەندانەی تەندروستی کە تووشی کۆرۆنابوون، رایگەیاند: “لێرەشەوە ئەوە ئاشکرا دەکەین کە لە سەرەتاى سەرهەڵدانى ڤایرۆسى کۆرۆناوە 195 پزیشک و کارمەند و شۆفیرى ئەمبوڵانس توشى ڤایرۆسەکە بوون و دڵنیام ژمارەکە لەوە زیاترە بەڵام بەشێکیان پێیان خۆش نیە ناویان ئاشکرا بکەن”.

هاوکات روونى کرەوە: “لە ناو فریاکەوتنیشدا سەنتەرى فریاکەوتنى خێراى 122 مانى گرتوە ئەگەر دۆخەکەش بەم جۆرە بەردەوام بێت تواناى بەڕێوبەردنى فریاکەوتن و شوێنە هەستیارەکانمانیشمان نامێنێت”.