ترەمپ چاکسازیی لەڕیزی پۆلیسی وڵاتەکەیدا دەکات

SNN-

سەرۆکی ئەمریکا فەرمانێک ئیمزا دەکات بەگوێرەی ناوەڕۆکەکەی دەستدەکرێت بە چاکسازیی کردن لەڕیزی هێزە ئەمنییەکانی وڵاتەکەیدا لەپێش هەموویانەوە هێزی پۆلیس.

دۆناڵد ترەمپ بەڵێنیشدەدات کە هەموو کەموکورتیی و ناڕێکییەکانی ناو پۆلیسی وڵاتەکەی نەهێڵێت، ئەویش دوای کوژرانی کەسێکی رەشپێست بەدەستی پۆلیسێکی ئەمریکا کە ناڕەزایەتیی توندی خەڵکی بەدوای خۆیدا هێنا.

لەپرێس کۆنفرانسێکدا ترەمپ ئەمڕۆ سێشەممە رایگەیاند “هەموو یاسا و رێنمایی و پێودانگەکان لەڕیزی پۆلیسدا رێکدەخەینەوە و وا دەکەین شکۆ بۆ ئەو هێزە بگەڕێتەوە”.

بەگوێرەی رۆژنامەی واشنتن پۆست، بڕیارەکەی ترەمپ خۆی دەبینێتەوە لە مەشقکردن و راهێنانی چڕ و نوێ بۆ دووبارە رۆشنبیرکردنەوەی پیاوی پۆلیس لەو وڵاتە.

رۆژی 25ی ئایاری رابردوو لەشاری مینیاپۆلس، چوار پۆلیس پیاوێکی رەشپێستی تەمەن 46 ساڵ بە ناوی جۆرج فلۆید بە تۆمەتی ساختەکاری رادەگرن و کەلەپچەی دەکەن.

پیاوە رەشپێستەکە لە نێو ئۆتۆمبێلەکەی بووە و پۆلیس دەیهێنێتە خوارەوە، دواتر یەکێک لە پۆلیسەکان پیاوە رەشپێستەکە دەخاتە سەر زەوی و قاچێکی دەخاتە سەر ملی، هەرچەند پیاوە رەشپێستەکە دەڵێت ناتوانم هەناسە بدەم، پۆلیسەکە وازی لێناهێنێت، تاوەکو دەبوورێتەوە و دواتریش لە نەخۆشخانە گیانلەدەستدەدات.

دوای کوژرانی چەندین خۆپشاندان ئەنجامدرا، کە گوزارشتبوون لە رەتکردنەوەی ڕەگەزپەرستی و نەهێڵانی توندووتیژی، بەڵام لە بەشێک لە شارەکانی ئەمریکا ئەم دۆخە بۆ گرژی و ئاڵۆزی و تاڵانی گۆڕا، ناچار سوپا هاتە ناوەوە نۆ کۆنترۆڵکردنی دۆخەکە.