بەرپرسێکی تورکیا: بنکەی سەربازی زیاتر لە هەرێمی کوردستان دەکەینەوە

SNN

بەرپرسێکی باڵای تورکیا رایگەیاند: ئەنقەرە پلانی هەیە بنکەی سەربازی کاتی دیکە لە هەرێمی کوردستان بکاتەوە.

ئەو بەرپرسەی تورکیا کە نەیویست ناوی ئاشکرابکرێت بە ئاژانسی هەواڵی رۆیتەرزی وتووە: “تورکیا پلانی هەیە لەو ناوچانەی کە گەریلاکانی پەکەکەی لێچۆڵکردووە، بنکەی سەربازی بکاتەوە بۆ ئەوەی رێگری لە سەرهەڵدانەوەی پەکەکە لەو ناوچانە بکەین”.

ئاماژەی بەوەشکردووە: “لە ئێستادا زیاتر لە 10 بنکەی سەربازی تورکیا لە باکووری عێراق (هەرێمی کوردستان) بوونیان هەیە، بنکەی زیاتریش دەکەینەوە”.

سەبارەت بەو ئۆپراسیۆنە سەربازییەی کە تورکیا دژ بە پەکەکە لە خاکی هەرێم دەستیپێکردووە، ئەو بەرپرسە وتوویەتی: “ئۆپراسیۆنەکە وادەیەک بۆ کۆتایی پێهێنانی دیارینەکراوە، تا ئەوکاتەی پێویست بێت بەردەوام دەبێت”.

ئەمە لەکاتێکدایە، ئەمڕۆ، فاتیح یەڵدز باڵیۆزی تورکیا بۆ دووەمجار لەم هەفتەیەدا بانگهێشتی وەزارەتی دەرەوەی عێراق کرا و لەو رێگەیەوە ئیدانەی بۆردومانەکانی ئەم هەفتەیەی تورکیا لە هەرێم کرا و لەلایەن وەزارەتی دەرەوەی عێراقەوە داوا لە تورکیا کرا دەستبەجێ هێرش و بۆردومانەکانی رابگرێت.