پەرلەمانتارێکی یەکێتی: پێویستە بە پەلە هێزێکی هاوبەش بۆ پاراستنی کەرکوک پێکبهێنرێت
SNN-عیماد جەباری
ئەڵماس فازڵ، ئەندامی فراکسیۆنی یەکێتی لە ئەنجومەنی نوێنەرانی عێراق رایگەیاند: “داوامان لە حکومەتی عێراق کردوە بەھەماھەنگی لەگەڵ ھەرێم پەلە بکەن بۆ پێکھێنانی ھێزێکی ھاوبەش لە نێوان پێکھاتەکانی کەرکوک، بۆ ئەوەی ئەو پارێزگایە بپارێزرێت”.
ئەو ئەندامەی ئەنجومەنی نوێنەران بە SNNی راگەیاند: لە ماوەی سێ ساڵی رابردوودا بینیمان کە پاراستنی دۆخی ئەمنی کەرکوک و قەزا و ناحیەکانی دەوروبەری، لەلایەن سوپای عێراقەوە سەرکەوتوو نەبووە.
وتیشی: بە ئاشکرا لە چەند شوێنێکی خوارووی پارێزگاکە جموجۆڵی تیرۆریستان دەبینرێت و ئەوەش بۆتە ھۆی ناسەقامگیری دۆخی ئەمنی و دووبارە کوشتنی ھاووڵاتیانی بێ تاوان.
بەوتەی ئەو ئەندامەی ئەنجومەنی نوێنەرانی عێراق: “کەرکوک شارێکی فرە نەتەوەییە و ناکرێت لەلایەن یەک نەتەوە و مەلەفی ئەمنی بەرێوەببردرێیت، کە شارەزای جوگرافیا و کلتووری پارێزگاکەش نین”، دەشڵێت لەبەر ئەوە داوای لە حکومەتی عێراق کردووە بەپێی رێژەی دانیشتوان و بەرکەوتەکانی ھەڵبژاردن ھێزێکی راھێنراو کەرکوک بپارێزێت.
راشیگەیاند: داوامان لە حکومەتی عێراق کردووە پەلە بکات لە پێکهێنانی ئەو هێزە هاوبەشەدا، لەپێناو پاراستنی پارێزگاکە.
لە ماوەی رابردوودا چەکدارانی داعش چەند جارێک هێرشیان کردووەتە سەر هاووڵاتیانی سنووری پارێزگای کەرکوک و ناوچە جێناکۆکەکانی دیکە، زیانیان بە رەز و باخی جوتیارانیش گەیاندووە.
