ئەنجومەنی وەزیران سەبارەت بە مووچە کۆدەبێتەوە

SNN

ئەمڕۆ ئەنجومەنی وەزیران سەبارەت بە رێکخستنەوەی دەرماڵە و مووچە، کۆبوونەوەیەک ئەنجامدەدات.

دوای ئەوەی لە كۆبوونەوەی رۆژی شەممەدا وەزیرەكانی كابینەی نۆیەم بۆچوونی جیاوازیان لەبارەی دەستكاریكردنی مووچە‌ و دەرماڵەكان هەبووە، ئەمڕۆ جارێكی دیكە ئەنجوومەنی وەزیران لەبارەی مووچە و دەرماڵەکان و چۆنیەتی پەرەپێدانی کەرتی تایبەت، لە رێگەی ڤیدیۆ كۆنفرانسەوە كۆدەبێتەوە.

بڕیاریشە سبەینێ دووشەممە هەرسێ‌ سەرۆكایەتییەكەی هەرێمی كوردستان کۆببنەوە و بڕیاری كۆتایی لەبارەی مووچە‌ و دەرماڵەكانەوە بدەن.

بۆ دەستكاریكردنی مووچە ‌و دەرماڵەكان پشت بە یاسای چاكسازی دەبەسترێت‌ کە بڕیارە لە سەرەتای مانگی تەمووزەوە بچێتە بواری جێبەجێکردنەوە، بەڵام تا ئێستا لەسەر چۆنیەتیی جێبەجێكردنی یاساكە، بەتایبەت ئەو ماددەیەی پەیوەندیی بە دەستكاریكردنی دەرماڵەوە هەیە، بۆچوونی جیاواز هەیە.