کازمی: ئەگەر رێگری لە کارەکانی حکومەت بکرێت دەستلەکاردەکێشمەوە

SNN

سەرۆک وەزیرانی عێراق رایگەیاند کە گۆڕانکاری لە پۆستە ئیدارییەکانی دەوڵەت دەکات و لە ئەگەری دروستکردنی بەربەست لەلایەن پارتە سیاسییەکانەوە، ئەوا دەستلەکاردەکێشێتەوە.

مستەفا کازمی لە دیدارێکیدا لەگەڵ ژمارەیەک میدیاکار لە شاری بەغدای پایتەخت باسی لەوەشکرد: “بەم نزیکانە گۆڕانکاری لە بەشێکی پۆستە ئیدارییەکانی حکومەت دەکەین. لەوانەیە رووبەڕووی رەخنە ببینەوە لەمباریەوە. ئەمەش ئەو لایەنانە دەیکەن کە بەھۆی ئەم گۆڕانکاریانەوە زیان بە بەرژەوەندییەکانیان دەگەیەنرێت”.

وتیشی: “ئەگەر رێگە بە کارەکانمان نەدرێت، ئەوا ھیچ شتێک نییە لەدەستی بدەین. بەدەستی خاڵی جێیدەهێڵین (دەستلەکاردەکێشینەوە)”.

کازمی جەختیشی لەوە کردەوە: “گەندەڵییەکانی وڵات لە تیرۆر مەترسیدارترن و ئاماژەی بەوەشدا بە دوای ئەو کەسانەوە دەبن کە گەندەڵی ئەنجام دەدەن”.

مستەفا کازمی لە 6ی ئایاری رابردووەوە پۆستی سەرۆک وەزیرانی عێراقی وەرگرتووە و لەگەڵ دەستبەکاربوونیدا چەند بەڵێنێکیدا، لەوانەش رووبەڕووبوونەوەی گەندەڵی لە دام و دەزگاکانی عێراقدا.