نەخۆشخانەی هیوا زۆربەی کارەکانی راگرت

SNN

نەخۆشخانەی هیوا لە شاری سلێمانی کە تایبەتە بە چارەسەرکردنی تووشبووانی شێرپەنجە تا رۆژی 4ی تەمووز زۆربەی كارەكانی راگرت و تەنها حاڵەتی كتوپڕ دەبینرێت.

د.یاد نەقشبەندی، وتەبێژی تەندروستی سلێمانی لەوبارەیەوە رایگەیاند: “لە پێناو سەلامەتی و پاراستنی تەندروستی نەخۆشە خۆشەویستەکان لە پەتای ڤایرۆسی کۆرۆنا و بە مەبەستی ڕێکخستنەوەی چەند کارێکی ناو نەخۆشخانە، لە ئەمڕۆ 27ی حوزەیرانەوە تا 4ی تەمووز تەنها حاڵەتە کتوپڕەکان لە نەخۆشخانەی هیوا دەبینرێن”.

وتەبێژەکەی بەڕێوەبەرایەتی گشتی تەندروستی سلێمانی ئەوەشی راگەیاندووە: “ئەو نەخۆشانەی لەژێر چارەسەری کیمیایی و هۆرمۆنیدان یان تەنها چاودێریان (متابعە) هەیە، لە دوای 4ی تەمووز سەردانی نەخۆشخانەی هیوا بکەن”.

ئاماژەی بەوەشكردوە: “سوپاسی هاوکاریتان دەکەین، بە هیوای سەلامەتی و تەندروستیەکی باش بۆ هەموو لایەک”.

تا ئێستا زیاتر لە سێ هەزار و 800 کەس لە سلێمانی تووشی کۆرۆنا بوون، لەو ژمارەیەش 138 کەسیان گیانیان لەدەستداوە و 759 کەسیش چاکبوونەتەوە.