ئاگرێكی گەورە سنووری پێنجوێنی گرتەوە و كۆنترۆڵكردنی ئەستەم بووە

SNN-عەلی حەمە سەعید

بەهۆكارێكی نادیار ماوەی دوو ڕۆژە ئاگرێكی گەورە سنووری چوار گوندی ناحییەی ناڵپارێزی سەربە قەزای پێنجوێنی گرتووەتەوە و بەهۆی بەرفراونی ئاگرەكە و بوونی كێڵگەی مین و تەقەمەنی كۆنتڕۆڵكردنی ئەستەم بووە، بەڕێوەبەری ناحییەی ناڵپارێزیش هۆكاری تەشەنەكردن و كۆنترۆڵ نەكردنی ئاگرەكە دەخاتە ئەستۆی بەڕێوەبەری ژینگە و دارستانی سلێمانی.

هێمن ئیبراهیم، بەرێوەبەری ناحییەی ناڵپارێزی سەربە قەزای پێنجوێن بە SNNی راگەیاند: لە دوێنێوە بە هۆكارێكی نادیار ئاگرێكی بەرفراوان سنووری شاخ و دارستانە سروشتییەكانی گوندەكانی (زەگی سەر، تەڕاتەوەن، چەوتان، كانی سپیكە) و چەند گوندێكی دیكەی گرتووەتەوە و تا ئێستاش ئاگرەكە بەردەوامی هەیە كە بەهۆیەوە زیانێكی زۆری ژینگەیی لێكەوتوەتەوە و بە هەزاران دۆنم لە دارستانی سروشتی ناوچەكە لە ناوچوون.

ئاماژەی بەوەشكرد، هۆكاری تەشەنەكردنی ئاگرەكە بۆ ئەوە دەگەرێتەوە كە ئەو ئامێرانەی كارمەندانی بنكەی ئاگركوژێنەوە و پۆلیسی دارستان بەكاریاندەهێنا لە كوژاندنەوەی ئاگرەكاندا، لەلایەن بەڕێوەبەری ژینگە و دارستانی سلێمانییەوە براونەتەوە بۆ سلێمانی و چەندین جار ئێمە و قایمقامی پێنجوێنیش داوای گەڕاندنەوەی ئەو ئامێرانەمان كردووە، بەڵام بۆمان ناگەرێنێتەوە، بۆیە بەهۆی نەبوونی هیچ ئامێرێكەوە ئاگرەكە زیاتر تەشەنەی سەندووە و كۆنتڕۆڵكردنی ئەستەم بووە.

بەڕێوەبەری ناحییەی ناڵپارێز ئەوەشی خستەڕوو، هۆكارێكی دیكەی تەشەنەكردن و كۆنتڕۆڵنەكردنی ئاگركە بۆ ئەوە دەگەرێتەوە كە ناوچەكە شاخاوییە و هاوكات چەندین كێڵگەی مین و تەقەمەنی لێیە و مەترسی لەسەر ژینی كارمەندانی ئاگركوژێنەوە دروستدەکات، هاوكات داوایان لە ئاگركوژێنەوەی قەزای پێنجوێن و ناحییەی گەرمەكیش كردووە بۆهاوكاری، بەڵام ناتواندرێت ئاگرەكە كۆنترۆڵبكرێت.